Aqtóbe oblysynda 6 jasóspirimge esirtki saýdalady degen kúdik keltirilip otyr
Aqtóbe oblystyq polıtsııa departamenti «Jastar. Jiger. Bolashaq» forýmyn uıymdastyrdy. Oǵan elimizge tanymal óner adamdarymen qatar Májilis depýtaty Q.Álishev shaqyryldy. Olardyń biri jastarǵa ákimshilik, qylmystyq jaýapkershilik týraly eske salsa, taǵy biri aǵalyq aqylyn aıtty. Al oblystyq Polıtsııa departamentiniń bastyǵy Abaı Júsipov jasóspirimder men jastar arasyndaǵy qylmys jaıyn baıandady.
- Aram pıǵyldy adamdar jasóspirimderdi ózderiniń jymysqy áreketterine paıdalanady. Esirtki adamdardy urlyqqa, zorlyq-zombylyqqa, qylmysqa ıtermeleıdi, otbasyn buzady. Esirtki tutynýdyń sońy jazataıym oqıǵalarǵa da ákep soǵady. Jyl basynan beri 40-qa jýyq jas, onyń ishinde 6 mektep jáne kolledj oqýshylary ustalyp, ýaqytsha tergeý ızolıatorynda qamaldy, - dedi oblystyq Polıtsııa departamentiniń bastyǵy Abaı Júsipov.
Sonymen birge mektep, kolledj, joǵary oqý oryndary arasyndaǵy býllıng, bopsalaý, álimjettik jaıy týraly da áńgime boldy.
- Bıyl býllıngten eki oqýshy kóz jumdy. Kináliler qazirgi kezde tergeý abaqtysynda. Oqý oryndarynda bopsalaýmen aınalysqan 7 jasóspirim oqýshy men stýdent qamaýǵa alyndy. Kóbine jastar ózin kórsetý úshin, keıde bazbireýlerge eliktep, qylmystyq jolǵa túsedi. Árkim ózi úshin jaýap beretinin túsinbeıdi. Aıaqasty týyndaıtyn ashý-yzanyń sońy qaıǵyǵa ulasyp jatady. Kez kelgen tóbeles adamdy múgedek etip, ólimge dýshar etedi. Ókinishke qaraı mundaı jaǵdaı bizde tirkeldi,- dedi Abaı Júsipov.
Eske salsaq, Aqtóbeniń Temir aýdany Qopa aýylynda oqýshylar tóbelesip, bir bala kóz jumdy. Qazir tergeý júrip jatyr.