Aqtóbe oblysynda 56 sheteldik jolaýshy jolda qalyp qoıǵan

<p>ASTANA. KAZINFORM — Aqtóbe oblysynda polıtseıler jolda qalǵan avtobýs júrgizýshisi men sheteldikterge kómektesti. Bul týraly Polisia.kz resmı saıtynda habarlandy.</p>

Elimizde aýa raıy kúrt nasharlady. Saldarynan keshe túnde Aqtóbe oblysynda respýblıkalyq joldar jabyldy. Táýlik boıy jumys isteıtin polıtsııa qyzmetkerleri jol qozǵalysyn rettep, kólik júrgizýshilerine kómektesip jatyr.

7 qarashada Qalybaı aýylynyń mańyndaǵy Samara — Shymkent tasjolynda Reseıden Tájikstanǵa baǵyt alǵan Van Hool reıstik avtobýs jolda turyp qaldy. Salonda 56 sheteldik jolaýshy, onyń ishinde 4 kámeletke tolmaǵan bala boldy.

— Tártip saqshylary adamdardy evakýatsııalap, kempıngke ornalastyrdy. Medıtsınalyq kómekke muqtaj adamdar bolǵan joq, — delingen vedomstvo habarlamasynda.

Polıtsııa qyzmetkerleri azamattardy aýa raıynyń qolaısyzdyǵyna baılanysty jolda barynsha saq bolýǵa shaqyrady.