Aqtóbe oblysynda 36 gektar aýmaq tasqynnan keıin dezınfektsııalanyp jatyr

<p>ASTANA. KAZINFORM — Tótenshe jaǵdaılar mınıstrliginiń ókili Asqar Shárip ortalyq kommýnıkatsııalar qyzmetinde ótken brıfıngide eldegi tasqyn ahýalyn málim etti.</p>

«Atyraý oblysynda tasqynyna qarsy jumystar kúsheıtilgen rejımde atqarylyp jatyr. Isataı jáne Mahambet aýdandarynda jalpy uzyndyǵy 143 shaqyrym bolatyn qorǵaý bógetin salý jumystary tolyǵymen aıaqtalyp jatyr. Atyraý qalasynda, Inder jáne Qurmanǵazy aýdandarynda bógetterdi bekitý jumystary jalǵasýda. Jaıyq ózeniniń boıyna aerovızýaldy barlaý jasalyp, tasqyn jaǵdaıyna monıtorıng júrgizildi. Qulsary qalasynda tasqyn aýmaqtarynan sý baǵytyn burý jáne sorǵytý jumystary jalǵasyp jatyr. Buǵan deıin Batys Qazaqstan oblysyna Almaty qalasy men Jetisý, Almaty oblystarynan kómekke kelgen Tótenshe jaǵdaılar mınıstrliginiń kúshteri men quraldarynyń bir bóligi jumys oryndaryna qaıtarylýda», — dedi ol.

Mınıstrlik ókili áli 6032 adamnyń evakýatsııa ortalyǵyn panalap otyrǵanyn aıtty.

«Qorǵanys mınıstrliginiń áskerı bóliminiń kúshteri, Tótenshe jaǵdaılar mınıstrliginiń radıatsııalyq, hımııalyq jáne bıologııalyq qorǵaý bólimsheleri Aqtóbe oblysynyń Qobda aýdanyndaǵy jalpy aýdany 36,2 gektar sý basqan aımaqtardy dezınfektsııalaý jumystaryn júrgizip jatyr. Jalpy respýblıka boıynsha 43 658 adam óz úılerine oraldy. Evakýatsııa ortalyqtarynda 6032 adam bar. 7763 turǵyn úı men 2844 aýladan sý baǵyty burylyp, sorǵytyldy», — dedi Asqar Shárip.