Aqtóbe oblysynda 14 aýyl dızel generatorymen kúneltip otyr

<p>ASTANA. KAZINFORM &ndash; Aqtóbe oblysynda 10 brıgada elektr jelilerin qalpyna keltirip jatyr. Bul týraly Aqtóbe oblysy ákiminiń orynbasary Asylbek Esenbaev aıtty.</p>

«Jalpy osy ýaqytta sý tasqynyna qatysty jaǵdaı oblysymyzda turaqty deńgeıde. Oblys ákiminiń tóraǵalyǵymen jedel shtab táýlik boıy jumys atqaryp jatyr. Ahýal tolyǵymen baqylaýda. Sý tasqyny bastalǵan kúnnen bastap búgingi kúnge deıin 41 eldi meken nemese 5 000-ǵa jýyq abonentke elektrmen jabdyqtaý qyzmeti qalpyna keltirildi. Qazirgi tańda 14 eldi mekende 236 abonent elektr energııasynan ajyratýly. Degenmen barlyq turǵyndarǵa dızel generatory arqyly toq berip jatyr», - dedi ol Ortalyq kommýnıkatsııalar qyzmetindgi brıfıngte.

Onyń atap ótýinshe, osy ýaqytta 10 brıgada, 60 tehnıka barlyq eldi mekende qalpyna keltirý jumystaryn jalǵastyrýda. Elektr qýatyn qalpyna keltirý jospary quryldy. Josparǵa sáıkes sý deńgeıiniń tómendeýine oraı 7 kún ishinde jumystar aıaqtalady.

«Oblystaǵy 11 eldi mekenmen jol qatynasy ýaqytsha úzildi. Salystyrmaly túrde aıtsaq 30 naýryzda osyndaı 17 eldi meken bolǵan. Búginde, 10 eldi mekenmen kólik qatynasyn ornatý jumystary júrgizilýde. Osymen birge, Oıyl aýylyndaǵy úlken kópirdi qalpyna keltirý jumystaryn bastaý josparlanyp otyr. Jobalaý mekemelerimen tehnıkalyq tekserý jumystary uıymdastyryldy. Osy aptanyń aıaǵyna deıin qalpyna keltirý jumystarynyń kólemin anyqtaıtyn bolamyz», - dedi Asylbek Esenbaev.