Aqtóbe oblysy sý tasqyny kezeńine daıyn ba?
Byltyr sýǵa ketken aýmaqtar erekshe baqylaýǵa alyndy
2023 jyly Aqtóbede Oıyl jáne Qobda aýdandarynda sý tasyp, aýylǵa kirgen bolatyn. Tótenshe jaǵdaı kezinde birneshe úı qulap, turýǵa jaramsyz bolyp qaldy. Byltyrǵy tasqyn qaıtalanbas úshin ózen jaǵasyn bekitý, bóget salý jumysy atqaryldy.
- Oıyl aýdany, Qaratal aýyly boıynsha 2023 jyldyń kúzinde qorǵanys bógeti kóterildi. Uzyndyǵy - 2 myń metr. Qaratal aýylyna aparatyn aýdandyq jol jóndeldi. Jolǵa qosymsha sý ótkizý qubyrlary salyndy. Sý tasqyny kezinde jaǵdaıdy baqylaımyz. Qazir qaýip barynsha azaıdy. Al Qobda aýdanynda qorǵanys bógeti salyndy. Saýqaıyń lımandy sýarý júıesinde qosymsha 8 shlıýz ornatyldy. Bul sý retteýge qajetti amal. Osy jolmen sýdy Úlken Qobda ózenine jiberemiz. Qobda ózeni jaǵalaýynda da qorǵanys bógeti salyndy. Onyń uzyndyǵy 1200 metr boldy, - dedi Aqtóbe oblystyq TJD bóliminiń bas mamany Álisher Sarbaev.
Sınoptıkterdiń boljamy boıynsha, kún endi kúrt jylynady. Qazirgi kezde Shalqar, Baıǵanın, Muǵaljar, Temir, Yrǵyz aýdandarynda joldardy sý shaıý qaýpi bar.
Óńirde 87 evakýatsııalyq beket ázirlendi
Aqtóbe oblysy boıynsha respýblıkalyq, oblystyq mańyzy bar joldarda ornalasqan sý ótkizý qubyrlarynda tazartý jumystary aıaqtalyp qaldy. Qazir atqarylǵan jumys úlesi 95% quraıdy. Bul degenimiz - 2234 qubyr men 608 kópir.
- Oblysta 36 eldimeken baqylaýda tur. Onda 11 myńǵa jýyq adam turady. Barlyǵy 11 aýylda qaýip joıylsa, 10-ynda azaıdy. Degenmen áli de 15 eldimekende qaýip bar. Olar Mártók, Oıyl, Qobda, Temir aýdandarynda ornalasqan. Tótenshe jaǵdaılar qyzmeti aqpan aıynan bastap kúsheıtilgen rejımde jumys istep jatyr. Shuǵyl qımyldaıtyn otrıadqa 40 qyzmetker bekitildi. Qandaı da bir tótenshe jaǵdaı bolsa, sol qyzmetkerler tez jetedi. Óńir boıynsha 87 evakýatsııalyq beket ázirlendi. Evakýatsııa beketine qajetti azyq-túlik úshin 60 kelisimshart jasaldy, - dedi Aqtóbe oblystyq TJD bólim bastyǵy Tars Kovalenko. Onyń aıtýynsha, bıyl sý tasqyny tirkelse, rezervte 3,9 mln teńge qarjy bar. Al aldyn alý jumystaryna 389 mln teńge bólindi.
Toń men qar qalyńdyǵynda ózgeshelik joq
Aqtóbe oblysy boıynsha eń tereń toń qalyńdyǵy 150 sm quraıdy. Bul Áıteke bı aýdanynyń ortalyǵy T.Júrgenov aýylynda tirkelgen. Tótenshe jaǵdaılar qyzmetiniń habarlaýynsha, byltyr da osy kórsetkish tirkelgen. Al qalyń qar Mártók aýdanynyń Rodnıkovka aýylynda tirkeldi. Mundaǵy qar qalyńdyǵy 92 sm quraıdy.
- Aqtóbe, Qarǵaly, Sazdy sý qoımalaryna áli sý kelip jatqan joq. Aqtóbe sý qoımasy 57, Qarǵaly 53, al Sazdy sý qoımasy syıymdylyǵynyń 49 paıyzynda sý bar. Byltyr bul ýaqytta Sazdy sý qoımasy tolyp turdy. Al Aqtóbe sý qoımasynda sý 95% boldy. Qazgıdromettiń málimetine súıensek, 20-25 naýryz aralyǵynda kún kúrt jylynady. Eskertý keldi. Oblystyń ońtústigi qazir baqylaýda. Onda qar erip ketti. Qala boıynsha áli de Qarǵaly men Elek ózeni boıynda ornalasqan saıajaılarda qaýip bar,- dedi Aqtóbe oblystyq TJD bólim bastyǵy Tars Kovalenko.
Aqtóbe qalasyn turǵyndarynan 300 ótinish tústi
Aqtóbe qalasynda qazir sý tasqynyna qarsy shtab jumysyn júrgizip jatyr. Búginde 300-den astam ótinish túsken. Turǵyndar sý sorý, ınertti materıaldar jetkizip berýdi suraǵan.
- Aldymen mamandar baryp, qaraıdy. Jaǵdaıǵa kóz jetkizgende ǵana kómek beriledi. Qalada sý tasqynyna qarsy jumystarǵa 400 mln teńge qarastyryldy,- dedi Aqtóbe qalasy ákimi apparatynyń azamattyq qorǵanys jáne tótenshe jaǵdaılar bóliminiń basshysy Bekzat Turǵalıev.
Eske salsaq, byltyr Aqtóbeniń Oıyl jáne Qobda aýdanynda sý tasqyny bolyp, adamdar evakýatsııalandy. Eki aýdanda da tótenshe jaǵdaı jarııalandy.