Aqtóbe oblysy: «Magadjan» bógetin kútip ustamaǵan kásipker tergelip jatyr

<p>ASTANA. KAZINFORM &ndash; Aqtóbe oblysynyń birneshe eldi mekenine sýy jaıylǵan &laquo;Magadjan&raquo; bógeti ıesiniń ústinen sotqa deıingi tergeý júrip jatyr. Bul týraly Qarjylyq monıtorıng agenttiginiń resmı ókili Álibek Ábdilov ortalyq kommýnıkatsııalar qyzmetinde ótken brıfıngide málim etti.</p>

«Aýyr zardaptarǵa ákep soqqan mindetterge nemquraıly qaraý faktisi boıynsha Aqtóbe oblysyndaǵy «Magadjan» bógetin senimgerlik basqarýǵa alǵan JShS basshysyna qatysty sotqa deıingi tergeý bastaldy.

Anyqtalǵandaı, 2014 jyly bul bóget balyq sharýashylyǵyn júrgizý maqsatynda jeke kompanııaǵa senimgerlik basqarýǵa berilgen. Alaıda seriktestik tarapynan, bógetti kútip ustaý jáne qyzmet kórsetý boıynsha óz mindetteri tıisinshe oryndalmaǵan», - dedi Álibek Ábdilov.

Onyń sózinshe, mundaı salǵyrttyqtyń saldary bıyl birneshe eldi mekenniń turǵynyn ábigerge túsirgen.

«Máselen, bıylǵy 5 sáýirde Aqtóbe oblysynyń Hromtaý aýdanynda ornalasqan «Magadjan» bógeti buzyldy.

Sý tasqyny nátıjesinde Alǵa aýdanynyń Besqospa, Qyzyltý jáne Tabantal aýylynan 215 adam, onyń ishinde 96 bala, sondaı-aq Aqtóbe qalasy Elek jáne Qarǵaly ózeniniń mańynda ornalasqan baý-baqsha ujymdarynyń turǵyndary evakýatsııalandy», - dedi resmı ókil.

Bul is boıynsha sotqa deıingi tergeý amaldary júrip jatyr. Sol tergeýdiń qorytyndysy boıynsha iske qatysy bar laýazymdy tulǵalardyń áreketine quqyqtyq baǵa beriledi.