Aqtóbe oblysy eks-ákiminiń soty: Ermek Imantaev ashtyq jarııalap, advokattan bas tartty
Bıyl 11 shilde kúni «Aqtóbe» ÁKK-niń eks-tóraǵasy Ermek Imantaevqa qatysty sottyń aldyn ala tyńdalymy ótti. Oǵan aldymen Qylmystyq kodekstiń «Laýazymdyq ókilettigin teris paıdalaný» baby boıynsha qylmystyq is qozǵalǵan. Keıin isti tergeý kezinde bul bap Qylmystyq kodekstiń «Senip tapsyrylǵan bóten múlikti ıemdenip alý nemese talan-tarajǵa salý» babyna aýystyryldy.
Buǵan deıingi sot otyrystarynda sottalýshy Ermek Imantaev densaýlyǵyna baılanysty shaǵym aıtyp, keıbir tyńdalymdy keıinge shegergen bolatyn. Búgin óz qorǵaýshylarynan bas tartyp, memlekettik qorǵaýshy surady. Memlekettik aıyptaýshy oǵan qarsy bolmady.
- Oblys prokýroryna, QAJ departamenti bastyǵyna ashtyq jarııalaıtynym týraly aıttym. Keshe jedel járdem meni aýrýhanaǵa alyp ketti. Dárigerler qurǵaq ashtyqtyń qaýipti ekenin aıtty. Júrek aýrýy bar adam eki kún ǵana shydaı alady eken. Soǵan qaramastan men táýekelge bardym. Meni estise eken deımin. Kezekshi prokýror, qandaı da bir memlekettik organnyń basshysy kelip, meniń ne aıtqym keletinin bilip, túsingisi kelmedi. Qylmystyq iste zańbuzýshylyq kóp. Prezıdentke 17 bettik hat joldadym. Kelispeıtin tustarymdy aıttym. Tipti Qylmystyq kodekstiń baby durys jazylmaǵan. Dálelder men aıyptaýlar qarama-qaıshy. Sot qarap otyr, biraq nazar aýdarmaıdy. Іsti qaıta tergeýge jiberdi de qaıta-qaıta suradym. Meni estimeıdi. Meniń ólsem quqyq qorǵaý organy estıtin shyǵar. Sondyqtan ashtyqty toqtatpaı, sońyna deıin jetkizgim keledi»,- dedi sottalýshy Ermek Imantaev.
Ol QR Bas prokýrory men QR Joǵarǵy sotynyń tóraǵasymen sóıleskisi keletinin aıtty.
- Basty maqsatym -QR Bas prokýrory men QR Joǵarǵy sotynyń tóraǵasymen sóılesý. Men barlyq organǵa, depýtattarǵa, prokýratýraǵa jazdym. Eshkim estimeıdi. Sol sebepten osyndaı shet bir iske barýǵa májbúr boldym,- dedi sottalýshy.