Aqtóbe men Úrimshi arasynda júk tasymaldaıtyn áýe reısi ashyldy

AQTÓBE. QazAqparat – Aqtóbe-Úrimshi baǵytynda júk tasymaldaıtyn áýe reısi iske qosyldy. Jyl basynan beri eki reıs jasaldy, dep habarlaıdy QazAqparat tilshisi.

«Qytaıdan Qazaqstanǵa qaraı júk tasymaldaıtyn reıs ashyldy. Ol Úrimshi men Aqtóbeniń arasyn jalǵaıdy. Bıyl eki aptada eki reıs ushty. Kóbine halyq jıi tutynatyn taýarlar tasymaldanady. Onyń ishinde kıim-keshek pen aıaq kıim bar. Jańa reıs naryqtaǵy baǵany turaqtandyrýǵa, Aqtóbeniń trazıttik áleýetin arttyrýǵa septigin tıgizedi dep oılaımyz. Bul óńir ekonomıkasyna oń áserin bereri sózsiz», - dedi Á. Moldaǵulova atyndaǵy Aqtóbedegi halyqaralyq áýejaıynyń basqarma tóraǵasy Dastan Malıev.

Aıta keteıik, júk reısiniń belgili bir ushý kestesi joq. Ázirge taýar tek Qytaıdan tasymaldanyp jatyr. Al, Qazaqstannan eshteńe jóneltilmeıdi.

Eske salsaq, ótken jyly naýryz-sáýir aılarynda Aqtóbe áýejaıyna jóndeý júrgizildi. Onda 200-ge jýyq plıta aýystyrylyp, nysan jumysy tolyqtaı qalpyna keltirildi.

Qazaqstan Avıatsııa ákimshiligi bir aıǵa jýyq ýaqyttan soń, ıaǵnı, 2022 jyldyń 15-sáýirinen bastap shekteýlerdi túgel alyp tastady.

Sondaı-aq byltyr Álııa Moldaǵulova halyqaralyq áýejaıy Aqtóbeden Oral men Tashkentke ushatyn jańa baǵyttardy iske qosady. Oralǵa reısti otandyq QazaqAir áýe kompanııasy oryndaıdy, al Tashkentke Uzbekistan Airways bekitildi.