Aqtóbe men BQO-nyń sý tasqynynan zardap shekken turǵyndaryna qarjylaı kómek kórsetildi

ASTANA. QazAqparat – Aqtóbe men Batys Qazaqstan oblystarynyń kóktemgi sý tasqynynan zardap shekken turǵyndaryna qarjylaı kómek kórsetildi. Bul týraly Májilis depýtattarynyń saýalyna Premer-Mınıstrdiń birinshi orynbasary Roman Sklıardyń jaýabynda aıtylǵan, dep habarlaıdy QazAqparat tilshisi.

«Sý tasqynynan zardap shekkenderge materıaldyq kómek kórsetý máselesi Aqtóbe jáne Batys Qazaqstan oblystary ákimdikteriniń turaqty baqylaýyna alynǵan. Onyń aıasynda zalaldy anyqtaý, qarjylyq kómek kórsetý jáne úılerdi salý jónindegi is-sharalar júzege asyrylady. Búgingi tańda berilgen ótinishterge sáıkes kelesideı kómekter kórsetildi: Aqtóbe oblysynyń ákimdigi jalpy somasy 44 mln teńgege 88 otbasyna 500 myń teńgeden sertıfıkat berdi. Sondaı-aq, zardap shekken úılerdiń menshik ıeleri «Qyzyl Jarty Aı» qoǵamdyq qorynan árbir otbasy múshesine (403 adam) 100 myń teńgeden, jalpy somasy 40,3 mln teńge demeýshilik kómek aldy», - dedi Úkimet basshysynyń birinshi orynbasary jaýabynda.

Onyń dereginshe, Batys Qazaqstan oblysynda zardap shekken 78 otbasyna «Jergilikti atqarýshy organdardyń sheshimi boıynsha muqtaj azamattardyń jekelegen sanattaryna áleýmettik tólemder» baǵdarlamasy boıynsha jalpy somasy 13,5 mln teńgege 50 AEK mólsherinde qarjylyq kómek kórsetildi. Sonymen qatar, Oral qalasynda, Bórli jáne Syrym aýdandarynda zardap shekken 189 úı ıesi «Qyzyl Jarty Aı» qoǵamdyq qorynan otbasynyń árbir múshesine (1 017 adam) 100 myń teńgeden jalpy somasy 101,7 mln teńgege demeýshilik kómek aldy.

«Qalǵan zardap shekken turǵyn jáne saıajaı úıleri boıynsha keltirilgen zalaldyń mólsheri eseptelip jatyr. Osy jumystyń nátıjeleri boıynsha qarjylyq kómek kórsetý josparlanǵan. Atyraý oblysy boıynsha turǵyn úılerdi sý basýdyń bolmaýyna baılanysty ákimdik materıaldyq kómek kórsetýdi kózdemeıdi», - dedi ol.