Aqtóbe medıtsına ýnıversıteti stýdentteriniń emtıhan baly qaıta eseptelip jatyr

AQTÓBE. QazAqparat – M.Ospanov atyndaǵy Batys Qazaqstan medıtsına ýnıversıteti ınternderi memlekettik emtıhanda túgel tómen ball jınady. Másele QR Densaýlyq saqtaý mınıstrligine jetip, ball qaıta eseptele bastady, dep habarlaıdy QazAqparat tilshisi.

M.Ospanov atyndaǵy Batys Qazaqstan memlekettik ýnıversıtetinde bıyl 400-den astam ıntern memlekettik emtıhan tapsyrdy.

Odan súrinbeı ótkenderi men joǵary ball jınaǵandary rezıdentýraǵa qujat tapsyryp, naqty mamandyq tańdaı alady.

Al ınternnen soń jumysqa kirisetinderi jalpy tájirıbeli dáriger bolyp, emhanada ýchaske boıynsha naýqastarǵa em júrgizedi.

Óz nátıjesimen kelispegen ınternder oıyn ashyq aıtyp, qarsylyq bildirdi.

«7 jyl boıy oqyp-toqyǵan bilimimizdi qorytyndylaıtyn emtıhan tapsyrdyq. Barlyǵy 100 suraq berildi. Suraqtar jalpy tájirıbeli dáriger deńgeıine sáıkes boldy, qıyndyq týdyrmady. Emtıhan tapsyrýǵa daıyndyq bir jyl buryn bastalady, bilimimizdi tekserý úshin aldyn ala synaq testileýden de ótemiz. Biz jaqsy nátıjege qol jetkizetinimizge sengen edik. Biraq bárimiz 60-70 ball tóńireginde jınadyq. Qazaqstan boıynsha birneshe medıtsına oqý orny ınternderiniń barlyǵy derlik alǵan baldarymyzdyń tym az dıapazonda bolýy kúmán týdyrdy, óıtkeni árkimniń deńgeıi ártúrli. Biz óz oıymyzdy ashyq aıtyp, narazylyq bildirdik. Testileý nátıjesin qaıta qaraýdy nemese bizdiń durys emes jaýaptarymyzdy kórsetýdi suradyq. Qazir tehnıkalyq qatelik ketkenin aıtyp, ınternterdiń baly qaıta eseptelip jatyr», - dedi Marat Ospanov atyndaǵy BQMÝ ınterni Gúljamal Saǵıdollova.

Keıin QR Densaýlyq saqtaý mınıstrligi tekserý júrip jatqanyn málimdedi.

«Test upaılaryna qatysty tekserý júrip jatyr. Tekserý aıaqtalǵan soń nátıjesin aıtamyz. Eger ball esepteý kezinde qatelikter bolsa, stýdent paıdasyna sheshiledi. Eger tómen baǵanyń sebebi anyqtalmasa, qaıta emtıhan tapsyrýǵa suranys jiberiledi», - dedi QR Densaýlyq saqtaý mınıstrligi.