Aqtóbe qoımalarynda sý deńgeıi túsip keledi

<p>AQTÓBE. KAZINFORM &ndash; Aqtóbe oblysy ákiminiń orynbasary Asylbek Esenbaev óńirdegi sý tasqyny saldary men atqarylǵan jumystar týraly aıtyp berdi.</p>

«Oblystaǵy úsh iri sý qoımasynyń deńgeıi qalypty. Sońǵy eki-úsh kúnde Qarǵaly sý qoımasynda jaýyn-shashyn saldarynan sý deńgeıi kóterilgen bolatyn. Keshe biz Qarǵaly qoımasyn tolyq aralap shyqtyq. Sý deńgeıiniń túsýi baıqalady. Qazirgi sátte sekýndyna 100 tekshe metr sý tranzıttik rejımde jiberilip otyr. Eki saǵat saıyn qoımadaǵy sý deńgeıi tekserilýde», - dedi A, Esenbaev Ortalyq kommýnıkatsııalar qyzmetinde ótken baspasóz máslıhatynda.

Spıkerdiń aıtýynsha, Aqtóbe oblysy boıynsha sý tasqyny jaǵdaıy turaqty, ondaǵy Jedel shtab táýlik boıy jumys atqarýda.

Óńirdiń 6 aýdanynda (Qobda, Muǵaljar, Temir, Áıteke bı, Oıyl, Yrǵyz) jáne Aqtóbe qalasynda jergilikti aýqymdaǵy tabıǵı sıpattyq tótenshe jaǵdaı jarııalanǵan. Tutas aımaqta 720 jeke quram, 185 tehnıka, 11 sý qaıyǵy jáne 8 sý sorǵysh jumyldyrylǵan.

«Oblystaǵy 27 eldi mekende 695 abonent turaqty jaryqsyz qalyp otyr. Olardyń 500-i tok beretin generatormen ýaqytsha qamtyldy. Jol ýchaskeleriniń sýǵa tolyp, shaıylyp ketýinen 11 eldi mekenmen jol qatynasy ýaqytsha úzilgen. Qalpyna keltirý jumystary 24/7 rejıminde júrgizilýde. Búgin «Alǵa-Qarabulaq» baǵytyndaǵy aınalma joly ashyldy. «Alǵa-Besqopa» baǵytyndaǵy qatynas qalpyna keltiriledi», - dedi ol.