Aqtóbe kóshelerine statsıonarlyq polıtsııa beketteri ornatyldy
Qaladaǵy adam kóp shoǵyrlanatyn oryndar men iri bazar mańy polıtsııa qyzmetkerleriniń baqylaýynda bolady.
«Temirjol vokzaly, Turǵyndar qalashyǵyndaǵy bazar men Ortalyq bazarda, aǵaıyndy Jubanovtar jáne 101 atqyshtar brıgadasy dańǵylynyń qıylysynda, Ortalyq meshit mańynda statsıonarlyq polıtsııa beketteri bar. Statsıonarlyq beketter ishki jáne syrtqy beınebaqylaý júıesimen, qysqy jáne jazǵy klımatty baqylaý júıesimen, statsıonarlyq radıobaılanyspen jabdyqtalǵan. Bólmeniń úshten biri áınek kúıinde. Bul, polıtsııa qyzmetkerleri jumysynyń ashyqtyǵyn qamtamasyz etedi. Qajet bolǵan jaǵdaıda statsıonarlyq polıtsııa beketin qalanyń kez kelgen jerine aýystyrýǵa bolady», - dep habarlady oblystyq Polıtsııa departamentiniń baspasóz qyzmetinen.
Statsıonarlyq beketterde polıtsııa qyzmetkerleri táýlik boıy kezekshilik atqarady. Kúndiz saǵat 08:00-den 20:00-ge deıin bekette ýchaskelik polıtsııa ınspektory bolady. Azamattardyń ótinishi men aryzyn qabyldaıdy. Quqyqtyq tártipti jáne azamattardyń qaýipsizdigin qamtamasyz etý úshin beketter men irgeles aýmaqtarda patrýldik qyzmettiń kezekshiligi uıymdastyrylady.
«Bul, azamattardyń suranysyna sapaly jaýap berýdi qamtamasyz etedi. «Polıtsııanyń qadamdyq qoljetimdiligi» qaǵıdaty boıynsha jumys isteýge septigin tıgizedi degen senimdemin», - dedi PD bastyǵy Atyǵaı Arystanov.