Aqtóbe qalasyndaǵy joldardy jóndeýge 9 mıllıard teńge jumsalady

AQTÓBE. QazAqparat - Aqtóbe qalasynda barlyǵy 45 kóshege jóndeý júrgiziledi. Jańa jol da salynady, dep habarlaıdy QazAqparat tilshisi.

Aqtóbe oblystyq máslıhattyń turaqty komıssııasynda jol qurylysy talqylandy. Aqtóbe qalasynyń ákimi Ashat Shaharovtyń aıtýynsha, bıyl uzyndyǵy 5,7 shaqyrym jol jańadan salynady. Al 12 shaqyrym jolǵa kúrdeli jóndeý júrgiziledi.
«Qalada 12 kósheniń jolyna ortasha jóndeý jumysyn júrgizý úshin 800 mıllıon teńge bólindi. Kúrdeli jóndeý júrgizýge 405 mln teńge qarastyryldy. Barlyǵy 45 kóshe jóndeý jumystarymen qamtylady. Qala joldaryn jóndeýge jáne salýǵa 9 mln teńge jumsalady», - dedi Ashat Shaharov.
Aqtóbe oblystyq jolaýshylar kóligi jáne avtomobıl joldary bóliminiń basshysy Aıbek Qaıyrdyń aıtýynsha, 2021 jyly 14,3 mlrd teńgege 96 jobany iske asyrý josparlanyp otyr.
«Bólingen qarajat esebinen 297,7 km jergilikti mańyzy bar avtomobıl joldaryn jóndeý josparlanǵan. Onyń ishinde 95,3 km oblystyq jáne 202,4 km aýdandyq mańyzy bar», - dedi Aıbek Qaıyr.

Bıyl «Aqtóbe - Orsk» avtomobıl jolyn qaıta qurý, «Qobda-Mártók» jolyn kúrdeli jóndeý, «Shubarqudyq-Oıyl-Qobda-Sol-Iletsk», «Pokrovka-Temir-Keńqııaq -Embi», «Aqtóbe-Rodnıkovka-Mártók avtomobıl joldaryn ortasha jónde aıaqtalady.