Aqtóbe qalasyndaǵy mektepterde ashylǵan evakýatsııalyq pýnktter jabylyp jatyr

<p>AQTÓBE. KAZINFORM &ndash; Aqtóbe qalasyndaǵy mektepterde ornalasqan evakýatsııalyq pýnktter jabylyp jatyr. Munda zararsyzdandyrý jumysy júrip, balalar mektepke oralady. Al úıin sý basqan turǵyndar jataqhana men qonaqúıge ornalasty.</p>

Aqtóbe qalasy men aýdandarda 40 mektep evakýatsııalyq pýnkt retinde jabdyqtalyp, úıine sý kirgen adamdarǵa berildi. Munda barlyǵy 4 myńǵa jýyq adam qonystansa, teń jartysyna jýyǵy bala boldy. Úsh aptaǵa jýyq ýaqyt ótkende úıine oralǵandar sany artyp, mektepter de óz qyzmetine qaıta kóship jatyr. 

– Qazir 5 kolledj ben 3 mektep evakýatsııalyq pýnkt qyzmetin atqaryp tur. Mektepter Yrǵyz jáne Oıyl aýdandarynda. Barlyǵy 8 bilim berý nysanynda myńnan astam adam bar. Onyń 314-i mektep jasyndaǵy bala. Al qaladaǵy mektepterde ornalasqan evakýatsııalyq beketter birtinden jabylyp, turǵyndar eki joǵary oqý ornynyń jataqhanasyna, bir qonaqúı men medresege ornalastyryldy. Olardaǵy adam sany – 349, - dep habarlady Aqtóbe oblystyq Bilim basqarmasynyń baspasóz qyzmeti.