Aqtóbe qalasynda qar jınaý jumysy úzdiksiz júrip jatyr
Aqtóbe qalasyndaǵy Almaty jáne Astana aýdandarynda qar jınaý jumysyn uıymdastyrý úshin aýmaq 24 ýchaskege bólindi. Barlyǵy 17 merdiger mekeme keshe túnnen bastap qardy polıgonǵa tasyp jatyr.
— Jumys brıgadalary eki aýysymmen kúni-túni jumys istep jatyr. Merdiger mekemeler brıgadalary aldymen magıstraldi joldarǵa, qoǵamdyq kólik baǵyttaryna, kópirlerge tuz qospasyn septi. Qysta kóshelerdi tazalaýǵa 350 birlik tehnıka shyǵady. Qalany qardan tazartý úshin kúndizgi aýysymda 30 brıgada (40 tıegish, 150 júk kóligi) jáne túnde 20 brıgada (20 tıegish, 60 júk kóligi) jumyldyrylady. Merdigerler qazirdiń ózinde 1250 tonna tuz, 1830 tonna qum-tuz qospasy jáne 2000 tonnadan astam qum jınaǵan, — dep habarlady qala ákiminiń baspasóz qyzmeti.
Máselen Astana aýdanynda qazir joldar ǵana emes, júrginshiler joly tazartylyp jatyr.
— Sanıtarlyq-tazalaý jumystaryna Astana aýdany boıynsha 800 mln teńgeden astam qarjy bólindi. Kommýnaldyq mekeme jumysshylary jazda shóp shaýyp, qoqys jınaıdy. Qysta qar jınaýmen aınalysady, — dedi Aqtóbe qalasy Astana aýdany TÚKSh bóliminiń basshysy Mıras Ájibaev.
Eske salsaq, Aqtóbe qalalyq kásipkerlik bólimi syrǵanaqtar men attraktsıondardy tekserip jatyr. Bárinde qaýipsizdik talaptary saqtalýy tıis.