Aqtóbe qalasynda aıaldama pavılonyn ornatý jumysy endi bastalady

<p>AQTÓBE. KAZINFORM &ndash; Aqtóbe qalasynda bıyl 50-den astam aıaldama pavılony ornatylady. Ol úshin bıýdjetten 145 mln teńge qarastyryldy. Merdigerler ázirge bir de bireýin qondyrmady.&nbsp;</p>

Aqtóbe qalasynda 820 aıaldama bar. Onyń 250-inde aıaldama pavılony joq. Bıyl 150 aıaldamaǵa jóndeý júrgiziledi. Sonymen birge 56 aıaldama pavılony salynaýy tıis.

– Jańa aıaldama pavılondarynyń keıbiri eskisin aýystyrady. Sol kezde eskileri buryn pavılon bolmaǵan aıaldamalarǵa ornatylady. Mundaıda turǵyndar ótinishi eskeriledi. Jańa turǵyn alaptarynda, sonymen birge aıaldama orny qarastyrylmaǵan jeke sektorlarda pavılon joq. Qala syrtyndaǵy keıbir jerlerde jol joq bolǵan soń pavılon da ornatylmaǵan, - dedi Aqtóbe qalalyq TÚKSh, jolaýshylar kóligi jáne avtomobıl joldary bóliminiń bas mamany Janesen Masabaev. 

Onyń aıtýynsha, áınekten, polıkarbonattan jasalǵany synyp qalsa, jóndelip turady. Sonymen birge syrlaý, oryndyqtaryn jóndeý, synǵanyn dánekerleý qarastyrylady. 

– Qazirgi kezde 56 aıaldama qurastyrylyp jatyr. Sodan keıin ǵana ornatý jumysyn júrgizedi. Bul jumystarǵa bıyl 145 mln teńge bólindi. Al aıaldama qaltashalaryn salý ol ózge jumys. Bıyl 30-ǵa jýyq qaltasha jasaldy. Sol jerlerge pavılon ornatady, - dedi Janesen Masabaev. 

Eske salsaq, Aqtóbede byltyr da aıaldama pavılonyn salý jumysy kúzde atqaryldy. Ol kezde de 56 pavılon salý qarastyryldy.