Aqtóbe qalasy aýmaǵynda zańsyz qoqys tógip ketetinder kóbeıgen

<p>AQTÓBE. KAZINFORM &ndash; Aqtóbelikter dalaǵa qurylys, turmystyq qatty qaldyqpen qatar, maldyń ishek-qarnyn tastap ketýdi ádetke aınaldyrǵan. Qazirgi kezde polıtsııa, ekologter men jergilikti atqarýshy organ ókilderi ondaı oryndardy anyqtap, joıý jumysyn júrgizip jatyr.</p>

«Qazaqstan Ǵarysh Sapary» UK» AQ-nyń ǵaryshtyq túsirilimi ekologter qolynda. Bul túsirilim 50 km qashyqtyqty qamtyǵan. Sonymen birge turǵyndardyń aryz-shaǵymy men memlekettik ekologııalyq ınspektorlardyń reıdtik jumysy da júrgiziledi. 

Foto: Aqtóbe oblysy ákimdigi

- Ǵaryshtyq túsirilim Aqtóbe qalasy men Alǵa aýdanynyń terrıtorııasyn tolyq qamtylǵan. Sonymen qatar Mártók, Hromtaý jáne Qarǵaly aýdandary aýmaǵynyń shamamen 30-40% kiredi. Byltyr Aqtóbe oblysy aýmaǵyndaǵy 292 jer ýchaskesinen qoqys tabyldy. Onyń 267-i tazartyldy. Bıylǵy túsirilim áli daıyn emes. Aqtóbe oblysy boıynsha Ekologııa departamenti, Aqtóbe oblysynyń Polıtsııa departamenti jáne oblys ákimdigi birlesken reıdtik is-shara ótkiziledi, - dedi Aqtóbe oblystyq Ekologııa departamentiniń memlekettik ekologııalyq ınspektory Gúljaınar Abdrahmanova.

Aqtóbede 15 sáýir men 15 maýsym aralyǵynda qoqysty zańsyz tastaý derekterin anyqtaý, aldyn alý úshin eki aılyq aktsııa júrip jatyr. Ol úshin barlyǵy 46 mobıldi top quryldy. Barlyǵy 100-den astam reıd júrgizilip, onda 1500-den astam buzýshylyq anyqtaldy. Ákimshilik quqyqbuzýshylyq týraly kodekstiń «Ortaq paıdalanylatyn oryndardy lastaý» baby boıynsha 500-den astam, al «Qalalar men eldi mekenderdiń aýmaqtaryn abattandyrý qaǵıdalaryn buzý, sondaı-aq qalalar men eldi mekender ınfraqurylymy obektilerin buzý, jasyl ekpelerin joıý jáne búldirý» baby boıynsha myńnan astam derek tirkeldi.

- Tabıǵatty qorǵaý polıtsııasy jergilikti atqarýshy organmen, ekologtarmen, ekobelsendilermen birge jumys isteıdi. Jyl basynan beri Ákimshilik quqyqbuzýshylyq týraly kodekstiń «Qalalar men eldi mekenderdiń aýmaqtaryn abattandyrý qaǵıdalaryn buzý, sondaı-aq qalalar men eldi mekender ınfraqurylymy obektilerin buzý, jasyl ekpelerin joıý jáne búldirý» baby boıynsha 2500-den astam, «Ortaq paıdalanylatyn oryndardy lastaý» baby boıynsha 3800-den astam derek tirkeldi. Bıyl shamamen 13 mln teńgeden astam aıyppul salyndy, - dedi Aqtóbe oblystyq PD Tabıǵatty qorǵaý tobynyń erekshe tapsyrmalar jónindegi aǵa ınspektory Serik Eleýov.

Onyń aıtýynsha, dalalyqta anyqtalǵan qoqys úıindisiniń ıesin tabý qıyn. Eger kýágerler bolyp, vıdeomaterıal usynsa, mindetti túrde ákimshilik jazaǵa tartylady. Sonymen birge qoqys ishinen qandaı da bir qujat, túbirtek bolsa, ıesin izdeıdi. Serik Eleýovtiń aıtýynsha, dalalyqta kóbine qurylys materıaldarynyń qaldyǵy, maldyń ishek-qarny men túrli kıim-keshek, tipti oıynshyqtar da kezdesedi.

- Qujattarda uıaly telefon ómiri, túrli satyp alý-satý, qyzmet kórsetý túbirtegi bolsa, mindetti túrde tekseremiz. Turǵyndar iri turmystyq qaldyqty polıgonǵa aparaýy tıis. Biraq ony kóbi eskere bermeıdi. Eger kináli adam anyqtalmasa, jergilikti atqarýshy organǵa habar beremiz. Turǵyn úı sharýashylyǵyna jaýapty qyzmetter tazartý júrgizedi. Qazir biz óz ekologııamyzdy ózimiz lastap, qurtyp otyrǵanymyzdy túsinýimiz kerek, - dedi Aqtóbe oblystyq PD Tabıǵatty qorǵaý tobynyń erekshe tapsyrmalar jónindegi aǵa ınspektory.