Aqtóbe qalalyq máslıhatynyń tóraǵasy qyzmetine Anar Darjanova saılandy

AQTÓBE. QazAqparat – Buǵan deıin Aqtóbe qalalyq máslıhatynyń hatshysy qyzmetin atqarǵan Anar Darjanova búgin tóraǵa bolyp saılandy, dep habarlaıdy QazAqparat tilshisi.

Búgin Aqtóbe qalalyq máslıhaty 8-shaqyrylymnyń alǵashqy sessııasyn ótkizdi.

Onda da jańadan saılanǵan depýtattarǵa káýlik pen tósbelgi tabystaldy. Olardyń sany – 32.

Bári de birmandattyq saılaý okrýgteri boıynsha saılandy.

Keıin depýtattar óz arasynan oblystyq máslıhattyń tóraǵasy qyzmetine Anar Darjanovany laıyq dep tanydy.

«Bul men úshin úlken jaýapkershilik. Men óz eńbek tájirıbemdi, bilimimdi aıamaı, sizdermen birge jumys isteımin», - dedi Anar Darjanova.

Keıin turaqty komıssııalardyń tóraǵasy tańdaldy. Al qala ákimi jańa saılanǵan depýtattardy quttyqtap, birge jumys isteýge shaqyrdy.

«Aldymyzda maqsat, problema kóp. Ony menen artyq bilmeseńizder, kem bilmeısizder. Qalanyń tazalyǵynan bastap, ınfraqurylymdy damytý, eldimekenderdi kórkeıtý, áleýmettik nysandar salý josparymyzda bar. Bul mindettemelerdi birge atqaramyz. Men 1-sáýirden bastap qalany sanıtarlyq tazartý boıynsha eki aılyq naýqan jarııaladym. Árbir depýtat óz okrýgi boıynsha halyqty jumyldyryp, osy naýqanǵa belsendi qatysady dep úmittenemin», - dedi qala ákimi Murat Jórebekov.

Aıta keteıik, Aqtóbe qalasynda saılaýshylardyń 44,5% tańdaýyn jasady.

Buǵan deıin habarlaǵanymyzdaı, oblystyq máslıhattyń tóraǵasy bolyp Gúlqasıma Súıintaeva saılandy.

Ol buǵan deıin oblys ákiminiń orynbasary qyzmetin atqarǵan edi.