Aqtóbe: Іnisine jer telimin bergen bólim basshysy men aýyl ákimi qyzmetten ketýi múmkin

AQTÓBE. QazAqparat – Ádep jónindegi keńes jer telimin jalǵa berý, jerdi memleket menshigine qaıtarý komıssııasynyń jumysyn tekserdi. Óz inisine jer telimin bergen Yrǵyz aýdandyq jer qatynastary bóliminiń basshysy Aralbaı Eralın men Yrǵyz aýyldyq okrýginiń ákimi Altynbek Sarın qyzmetinen aıyrylýy múmkin, dep habarlaıdy QazAqparat tilshisi.

Memlekettik qyzmet isteri agenttigi oblystyq departamentiniń Ádep keńesi Yrǵyz aýdandyq prokýratýrasynyń usynysyn qadaǵalaýdy kúsheıtti.

Keńes Yrǵyz aýdandyq jer qatynastary bóliminiń basshysy Aralbaı Eralın, Yrǵyz aýdandyq kásipkerlik jáne aýyl sharýashylyǵy bóliminiń basshysy Arman Nýrekeshov, Yrǵyz aýdandyq qurylys, sáýlet, turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń basshysy Igor Turtaev jáne Yrǵyz aýyldyq okrýginiń ákimi Altynbek Sarınge qatysty tártiptik is qozǵap, qyzmettik tergeý júrgizdi.

«2020 jyldyń 24-26 tamyz aralyǵynda sharýa nemese fermer qojalyǵyna jerdi ýaqytsha jalǵa berý úshin jer komıssııasynyń otyrysy ótti. Sol kezde konvertterdi ashý rásimi aýdıo, beınejazbaǵa túsirilmegen. Sonymen birge jer komıssııasynyń otyrysyn ótkizý hattamasy aýdıo-beıne jazbaǵa sáıkes toltyrylmaǵan. ıAǵnı, beıne jazbaǵa sáıkes 6 lot boıynsha daýys berý esebi tepe-teń bolsa, hattamaǵa sáıkes daýys berý esebi negizsiz joǵarylatylyp, oǵan barlyq komıssııa múshesi qol qoıǵan. Al Yrǵyz aýdandyq jer qatynastary bóliminiń basshysy A.Eralın «Nurǵalı» sharýa qojalyǵyna 2020 jyldyń 6 qazanynan bastap 2021 jyldyń 6 naýryzyna deıin Nura aýyldyq okrýginiń aýmaǵynan qys mezgilinde maýsymdyq shóp shabý úshin 15 637 ga jer ýchaskesin bergen», - dedi QR Memlekettik qyzmet isteri agenttiginiń Aqtóbe oblysy boıynsha departamentiniń memlekettik qyzmet salasyn baqylaý basqarmasynyń bas mamany Qaırat Akıev.

Sonymen qatar Yrǵyz aýdany, Amankól aýyldyq okrýginiń aýmaǵynda ornalasqan 1434 ga jer ýchaskesin alýǵa E.Eralın men T. Jubanyshev ótinish birdirgen.

Jer komıssııasy tóraǵasynyń orynbasary A.Eralın konkýrsqa qatysqan óz inisi Erbol Eralınge basymdyq berip, biraýyzdan ony jeńimpaz dep tanydy.

«Memlekettik qyzmette júrgenime 11 jyl boldy. Qatelik ketti, men ony moıyndaımyn. Negizi komıssııa otyrysy qaıta-qaıta keıingi shegerildi. Adam sany da jetpedi. Qazir inim jer alyp, mal baǵyp otyr», - dedi Yrǵyz aýdandyq jer qatynastary bóliminiń basshysy Aralbaı Eralın.

Ádep keńesinde A.Nýrekeshov, I. Turtaevqa qatysty qyzmetke tolyq sáıkes emes túrindegi tártiptik jaza qoldaný usynylsa, al A.Eralın men A.Sarındi jumystan shyǵarý túrindegi tártiptik jaza qoldaný týraly sheshim qabyldandy.