Aqtóbe-Hromtaý baǵytyndaǵy qaqyrap turǵan avtobýs jolaýshylardyń ashýyn týǵyzdy

<p>Aqtóbe-Hromtaý baǵytyndaǵy avtobýstyń kúıi jolaýshylardyń ashýyn týǵyzdy. Mundaǵy qoǵamdyq kólikterdiń bári derlik 30 jyldan astam ýaqyt boıy jańartylmaǵan, dep habarlaıdy <a href="Kazinform" target="_blank" rel="noopener">Kazinform</a>.</p>

Aqtóbe – Hromtaý baǵytyndaǵy avtobýstardyń qazirgi kúıi áleýmettik jeli arqyly tarap ketti. Onda avtobýstyń artqy bóligindegi oıyq pen jaryqtyń jolaýshylar ómiri úshin qaýipti ekeni kórsetilgen. Bul «Kerýen» JShS-ine tıesili avtobýs. 10 jyl boıy osy baǵytqa qyzmet kórsetip júrgen kompanııa avtobýsy eski, tipti qoldanysqa berilgenine 30 jyldan asyp ketken.

- Oblysta aýdandarǵa 11 baǵyt boıynsha jolaýshylar tasymaly uıymdastyrylǵan. Aqtóbeden Hromtaý, Qobda, Mártók, Alǵa baǵyttary bar. Hromtaý baǵytynda qıyn jaǵdaı týyndap tur. Jaýapty «Kerýen» kompanııasynda avtobýstary eskirgen. Negizi kelisimshart 2013 jyly jasalǵan. 10 jyl boldy. Al avtobýstary 90-shy jylǵy. Eski avtobýstar bolǵan soń ol shart talaptaryn oryndaı almaı otyr. Kúndelikti 10-12 reıs jasaý kerek bolsa, ol kúnine 3-6 reıs qana shyqqan. Sondyqtan bıyl tamyz aıynda «Qala trans» JShS-i shaqyrylyp, olar qosymsha 5 avtobýsty jelige shyǵardy. Ókinishke qaraı jol nashar, ákelgen avtobýstar da eski. Jıi-jıi jolda buzylyp qalady,- dedi Aqtóbe oblystyq jolaýshylar kóligi jáne avtomobıl joldary basqarmasynyń bólim basshysy Esbol Bazarǵalıev.

Onyń aıtýynsha, «Qala trans» JShS-imen qaıta kezdesip, taǵy qosymsha avtobýstar shyǵarýǵa kelisim júrdi. Ári jańa avtobýs bolmaǵanymen, jaǵdaıy jaqsy bolýy tıis dep talap qoıyldy.

- «Kerýen» JShS-i avtobýstardyń bárin 1989-1990 jyldary alǵan. 8 avtobýsy ǵana bar. Vıdeony kórdik. Kúndelikti reıske shyqqanda tehnıkalyq baıqaýdy mehanık júrgizedi. Al júrgizýshini medıtsına qyzmetkerleri tekserýi tıis. Bul kúni «Volvo» avtobýsy shyqqan. Oǵan shara qoldanamyz. Jalpy «Kerýen» JShS-i Ónerkásipti damytý qory arqyly avtobýs alýǵa bir jyl buryn suranys berip qoıdy. Qazir qaralyp jatyr. «Aqtóbe» ÁKK-i arqyly kepildik alsa, 10 avtobýs satyp alady,- dedi Aqtóbe oblystyq jolaýshylar kóligi jáne avtomobıl joldary basqarmasynyń bólim basshysy Esbol Bazarǵalıev. Avtobýstyń jaramdylyǵyn tekserýge qatysty oblystyq PD baspasóz qyzmetinen de suradyq. «Mekeme mehanıgi reıske shyǵar aldynda tekserýi kerek»,- dedi bastasóz qyzmetiniń jetekshisi Erbolat Sarqulov.