Aqtóbe halqynyń 87 paıyzy tabıǵı gazdy paıdalanýda
Aqtóbe oblysyn gazdandyrý jumysy jalǵasyp jatyr. Bıyl óńirde 7 jobany iske asyrýǵa 1 mıllıard teńgeden astam qarjy bólindi. Qarjy Shalqar, Áıteke bı, Qarǵaly, Mártók aýdandaryndaǵy birneshe aýylǵa gaz qubyryn jetkizý, aýylishilik gaz jelisin júrgizý jumystaryna jumsaldy.
«Aqtóbe oblysyndaǵy 375 eldimekeniniń 111-de gaz bar. Qazirgi kezde 730 myńnan astam adam gaz tutynyp otyr. Bul óńir halqynyń 87 paıyzyna teń. Oblystyń barlyq aýdan ortalyqtarynda gaz jetkizilgen. Aldaǵy ýaqytta oblys ákimdigi men «QazTransGaz» AQ arasynda memorandýmǵa qol qoıylýy múmkin. Barlyǵy 7,2 mıllıard teńgege 10 aýylǵa gaz jetkizý kózdelip otyr. ıAǵnı, taǵy 8 myńnan astam adam gaz tutyna alady. Ekomınıka mınıstrligine 2018-2019 jyldarǵa arnalǵan suranys berildi. Barlyǵy 32 jobany qolǵa alamyz. Bul jumystarǵa 9,8 mıllıard teńge jumsalady. Sonymen qatar, 15 jobalyq-smetalyq qujat ázirlenip jatyr», - dedi Aqtóbe oblysynyń energetıka jáne turǵyn úı-kommýnaldyq sharýashylyq basqarmasynyń basshysy Dastan Amanov.