«Aqtóbe» FK burynǵy bas dırektory sot arqyly qyzmetin qaıta surady
«Aqtóbe» fýtbol klýbynyń qarjysyn talan-tarajǵa salǵandardyń isi sotta qaralyp, burynǵy bas dırektor Dmıtrıı Vasılevtiń jeke múlki tárkilenip, 8 jylǵa bas bostandyǵynan aıyrý jazasy taǵaıyndaldy. Sot zalynan qamaýǵa alynǵan Reseı azamaty Qazaqstannyń Joǵary sotyna talap-aryz túsirip, túbegeıli aqtalyp shyqty. Keıin Aqtóbege qaıta kelip, qalalyq sotqa aryz túsirdi. Tipti, jumys ornyna, qyzmetine qaıta kelýdi maqsat etti.
«Dmıtrıı Vasılevtiń aryzy ishinara qanaǵattandyryldy. Sot QR Qarjy mınıstrliginen D.Vasılevtiń paıdasyna tárkilengen 1 668 100 teńge, 10 450 rýbl, 20 túrik lıri men 150 moldavalyq leıtti keri qaıtarýǵa sheshim qabyldady. Sonymen qatar, quny 72 000 rýbl bolatyn, arnaıy baǵdarlamasynyń lıtsenzııasy bar noýtbýk, 650 000 myń teńge bolatyn turǵyn úıdiń jaldaý aqysy, qazaqstandyq qorǵaýshylarǵa tólegen 1 240 000 teńge, medıtsınalyq shyǵynǵa tólengen 7 580 teńge, tamaǵy men jolaqysyna berilgen 2 015 390 teńge, kólik qatynasynyń 361 337 teńge shyǵyny aryz ıesine qaıtarylatyn boldy»,- dep habarlady oblystyq sottyń baspasóz qyzmeti.
Al Reseı qorǵaýshylaryna jumsalǵan 1 000 AQSh dollaryn qaıtarý, 2018 jyldyń sáýir aıynda jeke sot oryndaýshylary buǵattaǵan 1 094 312 teńgeni alý týraly ótinishi qaraýsyz qaldyryldy. Sonymen qatar, Dmıtrıı Vasılev óziniń eshqandaı qylmys istemegenin BAQ-qa sot sheshimimen shyǵarýǵa ótinish aıtqan bolatyn. Biraq bul da qaraýsyz qaldy.
Dmıtrıı Vasılev óziniń, áıeliniń Astana qalasyndaǵy kólik shyǵynyn da surady. Ol «Aqtóbe» FK-daǵy eńbekaqysyn, syıaqysyn surap, jumysqa qaıta ornalasýǵa ótinish berdi. Bul ótinishterdi sot qaraýsyz qaldyrdy.