Aqtóbe ferroqorytpa zaýytynda elektr symyn montajdap jatqan jumysshy mert boldy

<p>Aqtóbede jumysshy 9 metr bıiktikten qulap kóz jumdy. Ol Aqtóbe ferroqorytpa zaýytynda elektrmontajdaý jumysyn júrgizip jatqan, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Aqtóbe oblystyq eńbek ınspektsııasy basqarmasynyń habarlaýynsha, oqıǵa 10-qazan kúni saǵat 17:10-da bolǵan.

«Qazhrom» TUK AQ-na qarasty Aqtóbe ferroqorytpa zaýytynda elektr montajdaý jumysyn júrgizip jatqan «MSS-KIP Avtomatıka» JShS-niń 40 jastaǵy qyzmetkeri 9 metr bıiktikten qulap ketti.

Jumysshy birden jedel járdem aýrýhanasyna jetkizgenimen, 11 qazan kúni esin jımastan jan tapsyrdy.

Sol kúni Aqtóbe oblystyq eńbek ınspektsııasyna qaıǵyly jaǵdaı týraly habar tústi.

— Eńbek kodeksiniń 188-baby 4-bóligi negizinde arnaıy komıssııa qurylady. Komıssııa quramynda eńbek ınspektsııasynyń mamandary da bolady, — dep habarlady oblystyq eńbek ınspektsııasy basqarmasy.

Al Aqtóbe ferroqorytpa zaýyty áleýmettik jelidegi resmı paraqshasynda qaza tapqan jumysshynyń otbasyna kóńil aıtty.

— Aqtóbe ferroqorytpa zaýytynyń aýmaǵyndaǵy qurylys jumystary kezinde merdiger uıymnyń qyzmetkeri bıiktikten qulap tústi. Dárigerler onyń ómiri úshin baryn salyp kúreskenimen, aman alyp qalý múmkin bolmady. Oqıǵa týraly memlekettik organdarǵa habarlandy. Oqys oqıǵanyń mán-jaıy anyqtalyp jatyr. «Qazhrom» TUK» AQ ujymy marqumnyń týǵan-týystarynyń qaıǵysyna ortaqtasyp, kóńil aıtady, — dep jazylǵan habarlamada.