Aqtóbe bıliginde aýys-túıis boldy
Jańa qyzmetke taǵaıyndalǵan orynbasarlardyń biri Lázzat Orazbaeva 1971 jyly týǵan. Bilimi joǵary, Q.Jubanov atyndaǵy Aqtóbe ýnıversıtetin jalpy tehnıkalyq pánder jáne fızıka, Q.Jubanov atyndaǵy Aqtóbe óńirlik memlekettik ýnıversıtetin quqyqtaný mamandyǵy, quqyq bakalavry, «Turan-Astana» ýnıversıtetin pedagogıka jáne psıhologııa magıstri biliktilikteri boıynsha aıaqtaǵan. Osy laýazymǵa taǵaıyndalǵanǵa deıin «Aqtóbe qalasynyń bilim bólimi» MM-niń basshysy bolyp jumys atqardy. L.Orazbaeva qorǵanys, jalpy áskerı mindetti oryndaý, áskerı esepke alý jáne áskerı qyzmetke shaqyrý boıynsha is-sharalardy, sondaı-aq azamattyq qorǵanysty uıymdastyrý, qoǵamdyq tártip pen qaýipsizdik, turaqty turatyn oryndary joq adamdarǵa arnalǵan áleýmettik adaptatsııalyq ortalyǵynyń qyzmetin úılestirý, bilim berý, mektepke deıingi balalar tárbıesi jáne oqytý, mindetti tegin orta bilim berýmen qamtamasyz etý, áleýmettik kómek jáne áleýmettik qamsyzdandyrý, ana men balany qorǵaý, qaıyrymdylyq kómekti úılestirý, turǵyndardy jumyspen qamtý, t.b. máselelerge jetekshilik jasaıdy.
Al Juman Zıne arnaıy tekserýdiń nátıjelerin alǵan kúnge deıin qala ákiminiń orynbasary mindetin atqarýshy bolady.
Ol 1989 jyly týǵan. Bilimi joǵary. Qazaqstan-Brıtan tehnıkalyq ýnıversıtetin tehnıka jáne tehnologııa bakalavry, ekonomıka ǵylymdarynyń magıstri biliktilikteri boıynsha aıaqtaǵan.
«Ekonomıkalyq zertteý ınstıtýty» AQ eksperti, basqarma basshysy, Qazaqstan Respýblıkasy Ulttyq bankiniń jetekshi mamany, basqarma basshysynyń orynbasary, «Aqtóbe oblysy boıynsha memlekettik-jeke áriptestik aýmaqtyq Ortalyǵy» JShS dırektorynyń orynbasary bolyp qyzmet atqardy. Osy laýazymǵa taǵaıyndalǵanǵa deıin Aqtóbe qalasy ákimi keńesshisiniń mindetin atqarýshy bolǵan.
J. Zıne áleýmettik-ekonomıkalyq jáne bıýdjettik josparlaý jáne olardyń oryndalýy , kommýnaldyq menshiktiń esebin júrgizý jáne damytý, kásipkerlikti qoldaý jáne damytý, ınvestıtsııalar tartý jáne ınvestıtsııalyq jobalardy júzege asyrý, t.b. máseleler boıynsha jetekshilik etedi.
Zada Zeıin