Aqtóbe avtobýstarynda jol aqysy ósýi múmkin – Eraly Toǵjanov

ASTANA. QazAqparat – Aqtóbe oblysynyń ákimi Eraly Toǵjanov ortalyq kommýnıkatsııalar qyzmetinde ótken brıfıngide óńir ortalyǵynda qoǵamdyq kólik jol aqysy ósýi múmkin ekenin aıtty, dep habarlaıdy QazAqparat tilshisi.

«Qoǵamdyq kólik tasymaldaýshysy jol aqysyn 200 teńgege deıin kóterýdi surap otyr. Onsyz da marshýrttardyń bir bóligin sýbsıdııalaýǵa bıyl 4 mlrd teńge bólingen. Soǵan qaramastan tarıf qymbattaı ma?» dep surady BAQ ókili.

Oblys ákimi bul másele jan-jaqty zerdeleýden keıin sheshiletinin aıtty.

«Óńirde kólik tapshylyǵy úlken problema bolyp otyr. Sondyqtan bizde 100 avtobýs satyp alý týraly kelisim bar. Halyq sany qysqa ýaqyttyń ishinde 560 myńǵa jetip otyr. Onyń bári qosymsha kólikti qajet etedi. Onyń alǵashqy partııasymen 10 avtobýs kelip úlgerdi. Qalǵanyn eki aıdyń ishinde jetkizemiz. Al tarıfke kelsek, bul óte názik másele. Sondyqtan ony biz qoǵamdyq keńespen birge, qalalyq máslıhat depýtattarymen birge sheshýimiz kerek. Qalanyń ákimi máseleni solarmen birge talqylap jatyr. Óz usynystaryn beretin shyǵar», - dedi Eraly Toǵajnov.

Onyń aıtýynsha, tarıf kóterilýi múmkin.

«Ony endi kóterýimiz kerek qoı. Adamdardyń qaýipsizdigin qamtamasyz etý úshin avtobýstardyń bárin soǵan saı etýimiz kerek. Baǵanyń óskenine baılanysty tarıftiń kóterilýi de zańdy. Biraq onyń bárin ekonomıka basqarmasy bar, basqasy bar - bári birlesip naqty baǵany shyǵaratynyna kúmánimiz joq», - dedi ákim.