Aqtóbe áýejaıynyń ushý-qoný alańyna jóndeý júrgiziledi

AQTÓBE. QazAqparat – Aqtóbe áýejaıyndaǵy ushý-qoný alańy áýe kompanııasynyń ushaǵyn zaqymdady. Endi jóndeý júrgiziledi, dep habarlaıdy QazAqparat tilshisi.

Aqtóbedegi halyqaralyq áýejaıdyń ushý-qoný alańynda SCAT áýe kompanııasynyń ushaǵy búlinip, keıin beınematerıal men foto BAQ-ta keń talqylandy.

Osy oqıǵadan soń «Álııa Moldaǵulova halyqaralyq áýejaıy» AQ basqarma tóraǵasy Dastan Malıev túsinikteme berdi.

«SCAT áýe kompanııasynyń áýe kemeleriniń DV722 reısi, Aqtóbe-Nur-Sultan baǵytyndaǵy reısi, sondaı-aq 25 aqpanda Álııa Moldaǵulova halyqaralyq áýejaıynan Aqtóbe - Almaty baǵytyndaǵy DV712 reısi ushqan kezde ushaqtyń zaqymdalǵany týraly aqparat shyqty. Árqaısysynyń sebebi ártúrli. Máselen Nur-Sultanǵa ushatyn DV722 reısi týraly aıtatyn bolsaq, onda oń qozǵaltqyshynyń jeldetkishi búlingen. Al ózgesinde №3 negizgi dońǵalaqtyń rezeńkesine zaqym kelgen. Sol kezde aýa raıynan jasandy ushý-qoný jolaǵynda aqaý paıda boldy. Búginde jolaqtar qalpyna keltirildi», - dedi Dastan Malıev.

Aqtóbe áýejaıynyń basshylyǵy jasandy ushý-qoný jolaǵyndaǵy kez kelgen aqaýdy shuǵyl túrde joıýǵa ýáde berip otyr.

Al jóndeý aýa raıy qalypty bolǵan kezde júrgiziledi.

«Áýe aılaqtaǵy tas taqtalary aýystyrylady. Ol úshin biz barlyq qajetti resýrsty tabamyz. Bıyl sapaly joǵary, arnaıy sertıvıkaty bar qurylys materıaldaryn satyp alamyz jáne jumysty bilikti mamandarǵa ǵana tapsyramyz. Jospar boıynsha 300 tas taqtasy men qospa satyp alamyz. Ótken jyldarmen salystyrǵanda jasandy ushý-qoný jolaǵynyń jaǵdaıy jaqsarǵanyn atap ótkim keledi», - dedi dedi Dastan Malıev.

Aıta keteıik,byltyr Aqtóbe oblysy ákimdiginiń qoldaýymen áýejaıda uzyndyǵy 8 myń metr bolatyn aerodrom jabyndysy jóndeldi.