Aqtóbe áýejaıyna terrorlyq shabýyl «jasaǵandar» ustaldy
Óńirde 9-12 qyrkúıek aralyǵynda «Aspan - 2019» oqý-jattyǵýy ótti. T.Bıgeldınov atyndaǵy áýe qorǵanys kúshteri áskerı ınstıtýtynyń aerodromynda ótken sharaǵa aýmaqtyq qorǵanystyń arnaıy áskerı batalony, Ulttyq gvardııa bólimsheleri men polıtsııa departamenti, oblystyq tótenshe jaǵdaılar, densaýlyq saqtaý departamentteri qatysty. Aldyn ala berilgen stsenarıı boıynsha 60-qa jýyq adam «Aqtóbe» halyqaralyq áýejaıyna shabýyl jasamaq boldy.
Aýmaqtyq qorǵanystyń bastyǵy ári oblys ákimi qarýly toptyń kúshin joıýdy tapsyrdy. Kúzet qyzmeti jan-jaqqa habar jiberip, ózderi qarsy shabýylǵa shyqty. Keıin qosymsha kúsh kelip, qorǵanys kúsheıedi. Oqý-jattyǵý kezinde qoǵamdyq kólikti basyp alǵan terrorısterdi toqtatyp, ushaqty kepilge alǵandardy ustaý operatsııasy kórsetildi. Bul taktıkada arnaıy jasaqtyń daıyndyǵy pysyqtaldy.
«2017 jyly elimizdiń normatıvtik-quqyqtyq aktilerine ózgertýler men tolyqtyrýlar engizilip, aýmaqtyq qorǵanys ıntegratsııalandy. Osy kontseptsııaǵa sáıkes aýmaqtyq áskerı bólimder jasaqtalyp, jumys bastaldy. Búgingi oqý-jattyǵý osy baǵytta júrip, sátti ótti. Negizgi aýmaqtyq qorǵanys jasaqtaldy, olardy baılanys quralymen, qorǵanysy bar kıimmen qamtamasyz etýdi surap otyrmyz. Qazir jerligikti ákimdiktermen birge qarjylandyrý máselesi qarastyrylyp jatyr», - deıdi QR Qorǵanys kúshteriniń bas shtaby aýmaqtyq qorǵanys departamentiniń bastyǵy Sultan Kamaladınov.
Oqý-jattyǵýǵa qatysqan óńir basshysy Ońdasyn Orazalın kúshtik qurylymdardyń ózara birige atqarǵan jumysy úshin alǵysyn aıtty.
«Aýmaqtyq qorǵanys boıynsha ótkizilgen «Aspan-2019» oqý-jattyǵýy aıaqtaldy. Shara Memleket basshysynyń jedel jáne jaýyngerlik daıarlyq deńgeıin arttyrý jónindegi tapsyrmalaryn oryndaýǵa baǵyttaldy. Sondaı-aq aýmaqtyq qorǵanys brıgadasynyń strategııalyq obektisin kúzetý men qorǵaý is-qımyldaryna jaýyngerlik ázirligin tekserý, komandalyq quramnyń kásibı daǵdylaryn jetildirý maqsatynda ótkizildi. Dıversııalyq qaýip bul - kúndelikti shyndyq. Oǵan nemquraılylyqq tanytpaı, tótep berýge árdaıym daıyn bolýymyz kerek. Oqý-jattyǵý nátıjesi bizdiń aýmaqtyq qorǵanys bólimsheleriniń strategııalyq obektilerdi kúzetý men qorǵaý jáne qylmysty joıý is-qımyldaryna daıyn ekenin kórsetti», - deıdi oblys ákimi Ońdasyn Orazalın.