Aqtóbe áýejaıy taǵy eki jańa baǵytty iske qosady

AQTÓBE. QazAqparat – Aqtóbeden Oralǵa jáne Tashkentke reıs ashylady. Sonymen birge bıyl Taıland pen Dýbaı baǵytyna áýe kemesi qatynaıdy, dep habarlaıdy QazAqparat tilshisi.

Álııa Moldaǵulova halyqaralyq áýejaıy Aqtóbeden Oral men Tashkentke ushatyn jańa baǵyttardy iske qosady.

Oralǵa reısti otandyq QazaqAir áýe kompanııasy oryndaıdy, al Tashkentke Uzbekistan Airways bekitildi.

«Aqtóbeden Oral qalasyna 1 qarashadan bastap seısenbi jáne senbi kúnderi ushýǵa bolady. Al 1 qarashadan bastap, ıaǵnı, seısenbide turǵyndarymyz Ózbekstan astanasyna barýǵa múmkindik alady. Qazir kelissóz júrip jatyr. Tashkent - 2000 jyldan astam tarıhy bar Ózbekstannyń bas qalasy. Bul - Orta Azııadaǵy eń úlken jáne Uly Jibek jolynda ornalasqan eń kóne oryndardyń biri», - dedi «Álııa Moldaǵulova halyqaralyq áýejaıy» AQ basqarma tóraǵasy Dastan Malıev.

Aıta keteıik, Aqtóbe áýejaıy búginde 12 baǵytta jolaýshylar tasymaldaıdy. 5 áýekompanııaǵa qyzmet kórsetedi.

Jyl sońyna deıin baǵyttar sany 14-ke deıin artady.

«2022 jyly Antalııaǵa - aptasyna 6, Máskeýge - aptasyna 4 reıs qatynady. Shildede Bakýge turaqty reıster iske qosyldy. 19 qazannan bastap Phýket aralyna, Taılandqa, 24 qazannan bastap Dýbaıǵa, BAÁ-ge reıs ashylady», - dedi «Álııa Moldaǵulova halyqaralyq áýejaıy» AQ basqarma tóraǵasy Dastan Malıev.