Aqtóbe áýejaıy senimgerlik basqarýǵa beriledi
Álııa Moldaǵulova atyndaǵy Aqtóbe halyqaralyq áýejaıyn jekeshelendirý jáne baǵalaý saraptamasynyń qorytyndysy óńirlik kommýnıkatsııalar qyzmetinde aıtyldy. Oblys ákiminiń birinshi orynbasary Rýslan Hambarovtyń málimetine súıensek, áýejaı qunyn baǵalaý kezinde eshqandaı qatelik ketpegen.
«Jekeshelendirýdiń 2021-2025 jyldarǵa arnalǵan keshendi josparyna sáıkes bıyl áýejaıdy senimgerlik basqarýǵa berýdi josparlap otyrmyz. Táýelsiz baǵalaýshylar jumys júrgizdi. Alǵashqy kelisimshart bıyl naýryz aıynda jasalyp, áýejaı quny 7,3 mlrd teńge dep baǵalandy. Strategııalyq nysan ekenin bilemiz. Sondyqtan ákimdikpen qatar áýejaı da baǵalaý júrgizdi. Ekinshi baǵalaýda 6,8 mlrd teńgege esepteldi. Sóıtip 7,3 mlrd teńge bolyp bekitilip, úsh jylǵa senimgerlik basqarýǵa berý týraly sheshimdi komıssııa qabyldady. Osy ýaqyt aralyǵynda ınvestordyń jumysy baǵamdalady. Eger jumysty júrgize almasa, keri qaıtaryp alý qarastyrylǵan», - dedi oblys ákiminiń birinshi orynbasary Rýslan Hambarov.
Aıtyp óteıik, Aqtóbe áýejaıynyń qunyna kúmán keltirgen depýtattar QR Premer-Mınıstriniń birinshi orynbasary Álıhan Smaıylovtan áýejaıdy baǵalaý qunyn qaıta tekserýdi surady. Sóıtip baǵalaý qorytyndysyna saraptama júrgizildi. 27-qyrkúıek kúni jumys bastalyp, 21-qazanda qoryndyndy shyǵaryldy. Baǵalaý qunynda eshqandaı qatelik ketpegen.
«Endi arnaıy komıssııa otyrysy ótip, keıin ǵana tender jarııalanady. Qazir satý emes, úsh jylǵa senimgerlik basqarýǵa berý mańyzdy. Qazir «satyp alamyn» degen naqty ınvestor joq. Barlyq ınvestordy osy satylymǵa qatysýǵa shaqyramyn. Kelesi aptada resmı habarlandyrý berilmek», - dedi R.Hambarov. Onyń aıtýynsha, baǵalaýshynyń ózi kelmese de ókili áýejaıdy foto, vıdeoǵa túsirip alǵan. Bul zań talaptaryna qaıshy is emes. Ári senimgerlik basqarýǵa alatyn kompanııaǵa birqatar talap qoıylady. Rýslan Hambarov qarapaıy adamdar úshin bılet baǵasy kóterilmeıdi degen senimde.
Aıta keteıik, bıyl Aqtóbede 12 nysandy jekeshelendirý josparlanǵan. Kóbi jylý, sýǵa jaýapty kommýnaldyq mekeme.