Aqtóbe áýejaıy on kúnge jabyldy

AQTÓBE. QazAqparat - Aqtóbe áýejaıy 17-27 naýryz kúnderi aralyǵynda qyzmet kórsetýin toqtatady, dep habarlaıdy QazAqparat tilshisi.

Álııa Moldaǵulova áýejaıynyń ákimshiligi áleýettik jelidegi paraqshasy arqyly habarlandyrý taratty. Onda áýejaıdyń 10 kún boıy jabyq bolatyny eskertilgen.
«Áýejaıdyń 17-27 naýryz kúnderi aralyǵynda jóndeýge jabylatynyn habarlaımyz. Bıletterdi qaıtarý nemese qaıta brondaý suraqtary boıynsha satyp alý oryndaryna júginýdi suraımyz. Qazirgi jaǵdaı úshin keshirim suraımyz», - dep jazylǵan paraqshada.

Aıta keteıik, Azamattyq avıatsııa komıteti áýe aılaǵynyń 17 naýryzdan bastap jabylatynyn málimdegen edi. Oblys ákimdigi nysanda eki apta jóndeý júrgiziletinin aıtty. Keıin kúndiz jóndeý júrgizilip, túnde ushýǵa ruqsat beriletini jarııalandy. Al 12 naýryzda ushyp-qoný jolaǵynda jóndeý jumystaryn júrgizý barysynda jaldap alynǵan arnaıy tehnıka isten shyqqany, sol sebepti birneshe reıster keshiktirilgeni málim etildi.

Búgingi habarlamaǵa sáıkes, áýejaı múldem jabylady.