«Aqtóbe» «Atyraýdy» iri eseppen jeńdi

ASTANA. QazAqparat - Fýtboldan Premer-lıga komandalary arasyndaǵy el birinshiliginiń 6-týrynda «Aqtóbe» jeńiske jetti, dep habarlaıdy QazAqparat tilshisi.

Aqtóbelik klýb óz alańynda «Atyraý» komandasyn qabyldady. Kezdesý barysynda olar tizgindi óz qolynda ustaýǵa tyrysty. Qarsylas komanda qaqpasy mańynda jıi shabýyl uıymdastyrdy. Oǵan atyraýlyq qorǵaýshylar laıyqty tótep berdi.

Dese de, oıynnyń 40-mınýtynda «Aqtóbe» oıynshysy Lýka Gadranı esep ashyp ketti.

Ekinshi kezeńde de alań ıeleriniń basymdyǵy baıqalyp turdy. Taǵy da gol soǵatyn múmkindikti izdedi. Oıynnyń 81, 89-mınýtynda aqtóbelik klýbtan Arman Keńesov eki gol soqsa, Eskendik Qybyraı 94-mınýtta qorytyndy esepti belgiledi.

Osylaısha «Aqtóbe» qarsylasynan 4:0 esebimen basym túsip, týrnır kestesinde ekinshi orynǵa kóterildi.

Atalǵan týrda búgin «Qyzyljar» syrt alańda «Aqsýdan» 2:0 esebimen jeńip, qatarynan alty márte jeńiske jetti. Sol arqyly týrnır kestesindegi birinshi ornyn saqtap qaldy.

Eske salsaq, 15 sáýirde «Qaısar» «Jetisýdan» 2:0 esebimen basym tússe, «Kaspıı» «Oqjetpesti» 2:1, «Shahter» «Maqtaraldy» 3:0 esebimen jeńdi.