«Aqtóbe - Atyraý» tasjolynyń qurylysy 2020 jyly aıaqtalady - mınıstr
Aqtóbe oblysyna jumys saparymen Investıtsııalar jáne damý mınıstri Jeńis Qasymbek kelip, aldymen taý-ken salasyndaǵy jumysshylarmen kezdesti. Sonymen qatar, sońǵy jyldary salynǵan joldardy qarap, kólik logıstıka salasyndaǵy jobalarmen tanysty. 7-20-25 baǵdarlamasynyń iske asyrylý joldaryn qarap shyqty.
«Aqtóbe oblysy turǵyn úı qurylysy boıynsha elimizde alǵashqy bestikke endi. Munda jyl saıyn 800 myń sharshy metr turǵyn úı paıdalanýǵa berilip keledi. Aldaǵy jyldary 7-20-25 baǵdarlamasyna basymdyq beriledi. Qazir Aqtóbede 131 ótinish maquldandy. Ulttyq bank pen ákimdikter baspananyń qoljetimdiligin arttyra túsip, alǵashqy jarna sýbsıdııalanady. Elimiz boıynsha 3 óńir «Baspana» ıpotekalyq kompanııasy arqyly «Jas arman» jobasyn iske asyrady. Jas mamandar men bıýdjettik sala qyzmetkerleri úshin alǵashqy jarna qunyn eki ese azaıtýǵa múmkindik bar», - dedi Investıtsııalar jáne damý mınıstri Jeńis Qasymbek.
Mınıstr taý-ken salasynyń jumysshylarymen kezdesý kezinde aýyz sýmen qamtamasyz etý jumysyna toqtaldy. 2011 jyly ortalyqtandyrylǵan aýyz sýmen qamtamasyz etý Aqtóbe oblysynda 28 paıyz bolsa, búginde 50,5 paıyzǵa jetti. Osy jyly 6 mıllıard teńge ıgerilip jatyr. Jyl saıyn sýmen qamtamasyz etý 54,4 paıyz bolady.
«Buryn respýblıkalyq mańyzy bar joldarǵa basymdyq berilse, endi jergilikti joldar jóndeledi. Bul maqsatqa keler jyly 10,9 mıllıard teńge bólinedi. Sonymen qatar, «Aqtóbe - Atyraý» tasjolynyń qurylysy 2019 jyly qarqyn alyp, 2020 jyly aıaqtalady. Al 2021 jyly bar kem-ketigi tolyq qalpyna keltiriledi. Bul jumysqa respýblıkalyq bıýdjetten aqsha bólinip, halyqaralyq bankterden qarjy alyndy», - dedi Investıtsııalar jáne damý mınıstri Jeńis Qasymbek.
Aıta keteıik, buǵan deıin «Aqtóbe - Atyraý» tasjolynyń 11-160 shaqyrym aralyǵy jańadan salynatyny habarlanǵan bolatyn.