Aqtóbe-Atyraý tasjoly halyqaralyq bankterdiń qoldaýymen jóndelip jatyr

AQTÓBE. QazAqparat - Aqtóbe-Atyraý baǵytynda jol jóndeý jumystary bastaldy. Qazirgi kezde joldyń 160-330 shaqyrymyn jóndeıtin eki merdiger kompanııa anyqtaldy, dep habarlaıdy QazAqparat tilshisi.

Aqtóbe qalasynda jáne barlyq aýdanda jol jóndeý jumystary júrip jatyr. Bul baǵyttaǵy jumysqa bıyl 9,7 mıllıard teńge bólingen. Esep boıynsha 254 shaqyrym jol jóndelip, qalpyna keltiriledi.

«Aqtóbe oblysynyń ár aýdanynda 2-10 kóshe jóndelip jatyr. Mundaı aýqymdy jóndeý buryn bolǵan joq. «Nurly jol» baǵdarlamasy boıynsha Yrǵyz-Shalqar, Shalqar-Embi, Embi-Qandyaǵash joldary Aqtóbe-Astrahan jolyna shyǵady. Bul joldyń jobalyq-smetalyq qujattaryn daıyndaý jumysy aıaqtaldy. Qurylys jumystary bastaldy. Respýblıkalyq tasjoldyń 160-330 shaqyrymyn eki merdiger kompanııa jóndeıdi. Azııa damý bankinen qarjy bólindi. Úsh jylda jol paıdalanýǵa beriledi»,- dedi Aqtóbe oblystyq jolaýshylar kóligi jáne avtomobıl joldary basqarmasynyń basshysy Aıazbaı Osmanǵalıev.

Al Aqtóbe-Atyraý tasjolynyń 11-160 shaqyrymy boıynsha baıqaý qazan aıynda aıaqtalady. Bul jol Islam bankiniń qoldaýymen salynady.

Sonymen qatar respýblıkalyq Aqtóbe-Orsk trassasynyń qurylysy júrip jatyr. Barlyǵy 8 shaqyrym joldy jóndeýge 3 mıllıard teńge jumsaldy.