Aqtóbe Astananyń 20 jyldyǵyna oraı avtokerýen uıymdastyrady

ASTANA. QazAqparat - Aqtóbe oblysy Astana qalasynyń 20 jyldyq mereıtoıyna oraı «Qutty meken Aqtóbeden - araıly Astanaǵa!» atty avtokerýen uıymdastyrady. Bul týraly búgin Ortalyq kommýnıkatsııalar qyzmetindegi baspasóz máslıhatynda Aqtóbe oblysynyń ákimi Berdibek Saparbaev aıtty, dep habarlaıdy QazAqparat.

«Astananyń 20 jyldyq mereıtoıyna oraı Aqtóbe oblysy «Qutty meken Aqtóbeden - araıly Astanaǵa!» atty avtokerýen uıymdastyrady. Ol mamyr aıynda «Orynbor-Aqtóbe-Qyzylorda-Almaty-Astana» baǵyty boıynsha ótedi», - dedi Berdibek Saparbaev.        

Onyń aıtýynsha, avtokerýen qatysýshylarynyń qarasynda óńirdiń tanymal mádenıet jáne óner qaıratkerleri, qoǵamdyq uıymdardyń ókilderi, ǵalymdar, halyqaralyq deńgeıde tanylǵan sportshylar, úzdik dárigerler men jastar qozǵalysynyń belsendileri bolady.

Avtokerýen baǵytynda olar ondaǵan eldi mekende bolyp, jergilikti turǵyndarmen kezdesýler ótkizedi. Sonymen qatar aýyl azmattaryna medıtsınalyq kómek kórsetý, kúrdeli hırýrgııalyq otalar jasaý, túrli sheberlik sabaqtaryn ótkizý jáne shyǵarmashylyq ujymdardyń kontserttik baǵdarlamalaryn kórsetý josparlanǵan.

Aıta keteıik, Aqtóbe oblysynyń ákimi Berdibek Saparbaevtyń baspasóz máslıhaty aıasynda Qazmedıa ortalyǵynyń birinshi qabatynda óńirde «Rýhanı» jańǵyrý baǵdarlamasy aıasynda júzege asyrylǵan jobalardyń kórmesi ótti.