Aqtóbe ákimi ortalyq stadıondy jańa maýsymǵa daıyndamaǵan qyzmetkerlerdi jazalaıdy

AQTÓBE. QazAqparat - Aqtóbeniń ortalyq stadıony jańa fýtbol maýsymyna daıyn emes. Oblys ákimi Ońdasyn Orazalın qarjylyq, kadrlyq suraqtardy qaıta qaraıtynyn eskertti, dep habarlaıdy QazAqparat tilshisi.

Búgin oblys ákimi Ońdasyn Orazalın Qobylandy batyr atyndaǵy ortalyq stadıonnyń jaǵdaıymen tanysty. Stadıon jańa maýsymǵa daıyn emes. Munda bir aı buryn jasyl alańdy jylytý qurylǵysy iske qosylǵanymen jumys alǵa baspaǵan. ıAǵnı, kúrdeli jóndeý jumystary qajet. Ári kórermender otyratyn oryn men stadıon ǵımaraty eskirdi. Stadıonǵa jaýapty Aqtóbedegi fýtboldan balalar jáne jasóspirimder sport mektebiniń dırektory Gúlnaz Kartanova men oblystyq dene shynyqtyrý jáne sport basqarmasynyń basshysy Meırambek Mahametov mardymdy jaýap bere almady.

«Jaýapty adamdar jumysqa jaýapkershilikpen qaramaǵan. Shynyn aıtqanda, bul jaǵdaı jaýapty adamdardyń kásibı deńgeıin kórsetedi. «Jańa maýsymǵa daıyn, másele joq» dep aldap tursyzdar. Jaǵalaı jaýapsyzdyq jaılaǵan. Nátıjesinde jasyl alań, sektorlar daıyn emes. Men stadıonnyń mundaı jaǵdaıǵa túskenin birinshi ret kórip turmyn. Stadıonnyń, fýtboldyń qala úshin mańyzdylyǵyn eskerip, uıymdastyrý, kadrlyq jáne qarjylyq suraqtardy sheshýde shuǵyl sheshim qabyldaıtynymdy eskertemin. Keıbir adamdardyń munda tekke júr», - dedi oblys ákimi Ońdasyn Orazalın.

Aqtóbe oblysy ákimi baspasóz qyzmetiniń habarlaýynsha, stadıondy kúrdeli jóndeýden ótkizý týraly shuǵyl jıyn ótetin boldy.