Aqtóbe ákimdigi nelikten qar jaýǵanda jol salynyp jatqanyn túsindirdi

AQTÓBE. QazAqparat – Aqtóbede Ońtústik aınalma joldyń qurylysy bitpeı qaldy. Oblystyq jolaýshylar kóligi jáne avtomobıl joldary basqarmasy qar túskende asfalt emes, qara qıyrshyq tas tósegenin aıtty, dep habarlaıdy QazAqparat tilshisi.

Aqtóbeniń Ońtústik aınalma jolynda jol qurylysy túnde júrgizilgen. Bul vıdeo áleýmettik jeli arqyly tarap, turǵyndar shaǵym bildirdi.

Al oblystyq ákimdik bul asfalt tóseý emes, qara qıyrshyq taspen joldyń astyńǵy qabatyn saqtap qalýǵa arnalǵan ádis dep otyr.

«Bul - keler jylǵa daıyndyq. Joldyń astyńǵy qabatyn saqtap qalý maqsatynda qara qıyrshyq tas tósep jatyr. Merdiger mekeme osy jolmen buǵan deıin atqarǵan jumysyn saqtap qalǵysy keldi. Keler jyly bári qalpyna keltirilip, naǵyz asfalt tóseledi. Merdiger mekeme – «KTP» JShS. Ońtústik aınalma joldyń 21,5 – 35,3 shaqyrymy aralyǵyna sol kompanııa jaýapty. Joba aýyspaly. 2018 jyly bastaldy, keler jyly aıaqtalady», - dedi oblystyq jolaýshylar kóligi jáne avtomobıl joldary basqarmasy basshysynyń orynbasary Rústem Tóreǵalıev.

«Jol aktıvteriniń ulttyq sapa ortalyǵy» RMK oblystyq fılıaly Telman Malaevtiń aıtýynsha, buǵan deıin barlyq basqarma basshylary men merdigerlerge aýa temperatýrasy -5 gradýs bolǵan kezde asfalt jabyndysyn tóseýge bolmaıtynyn eskertken.

Bul týraly qyrkúıek aıynda barlyq merdigerge habarlama jiberildi.