Aktıvterdi qaıtarý: «Dýman» qonaq úı kesheniniń ıelerinen 1,3 mlrd teńge óndirildi

ASTANA. QazAqparat – QR Bas prokýrory Berik Asylov elordalyq kásipkerlerden 1 mlrd teńgeden astam soma óndirip alynǵanyn aıtty, dep habarlaıdy QazAqparat tilshisi.

«Joǵarǵy Sot qaýlysy elordalyq «Dýman» qonaq úı kesheniniń ıelerinen 1,3 mlrd teńge óndirip alýǵa múmkindik berdi. Budan basqa, sottar zańsyz satylǵan memlekettik múlikti qaıtarý jónindegi ondaǵan talaptardy qanaǵattandyrdy. Olardyń ishinde óndiristik nysandar, bazarlar, kommertsııalyq úı-jaılar, elıtalyq ýchaskeler jáne basqalary bar», - dedi Berik Asylov Ekonomıkalyq resýrstardyń zańsyz shoǵyrlanýyna qarsy is-qımyl máseleleri jónindegi vedomstvoaralyq komıssııa otyrysynda.

Bas prokýrordyń aıtýynsha, sot sheshimi boıynsha Atyraý qalasyndaǵy Suıytylǵan munaı gazdy saqtaý parkiniń 50% úlesi Atyraý munaı óńdeý zaýyty menshigine qaıtaryldy.

«Quqyq qorǵaý organdary qylmystyq ister sheńberinde jalpy 620 mlrd teńgege aktıvterdi qaıtardy, onyń ishinde sheteldik ıýrısdıktsııalardan 575 mln dollar keldi. Basqa memleketterge quqyqtyq kómek kórsetý týraly 100-den astam suraý hat joldandy. Olar boıynsha 100 mln AQSh dollarynan asatyn múlikke tyıym salyndy», - dedi B. Asylov.

Qarjy mınıstrligi qarjy-ónerkásip toptarynyń kásiporyndarynan qosymsha 100 mlrd teńgeden astam salyq óndirip aldy.

Ekologııa jáne tabıǵı resýrstar mınıstrligi qarjy-ónerkásip toptarynyń kompanııalaryna 7 mlrd teńgege jýyq aıyppul saldy, al Básekelestikti qoldaý jáne damytý agenttigi 4 mlrd teńgege sanktsııalar qoldandy.

Prokýrorlardyń sharalary arqyly olıgopolııa sýbektilerine buryn negizsiz berilgen nemese nysanaly maqsaty boıynsha paıdalanylmaıtyn 460 myń gektardan astam jer qaıtaryldy.

Sondaı-aq naryq baǵasynan 4 ese tómen baǵamen satyp alynǵan Almatynyń kóterme saýda naryǵyndaǵy úlesi, olıgopolııa sýbektileriniń menshiginde zańsyz bolǵan Almaty áýejaıynyń 17 kommertsııalyq úı-jaılary memleketke qaıtaryldy.

Aıta keteıik, Bas prokýratýrada Ekonomıkalyq resýrstardyń zańsyz shoǵyrlanýyna qarsy is-qımyl máseleleri jónindegi vedomstvoaralyq komıssııanyń kezekti otyrysy ótti. Tutastaı alǵanda, memleketke ortaq kúsh-jigermen 760 mlrd teńgeden astam somaǵa aktıvter qaıtaryldy, onyń ishinde sheteldik ıýrısdıktsııalardan 575 mln dollar kelgen.