Akter Angýs Klaýd 25 jasynda kóz jumdy

ASTANA. QazAqparat – «Eıforııa» telehıkaıasynyń juldyzy Angýs Klaýd 25 jasynda qaza tapty. Ol ótken aptada Irlandııada jerlengen ákesiniń óliminen keıin qatty qaıǵyryp júrgen, dep habarlaıdy QazAqparat Euronews-ke silteme jasap.

«Eıforııa» telehıkaıasynyń juldyzy, amerıkalyq akter Angýs Klaýd 25 jasynda Kalıfornııa shtaty Oklendtegi úıinde qaıtys bolǵan.

Onyń neden qaıtys bolǵany belgisiz. Akter ótken aptada Irlandııada ákesin jerlep, onyń ólimine qatty qaıǵyrǵany aıtylady.

«Angýs densaýlyǵyndaǵy psıhıkalyq problemalar týraly ashyq aıtatyn. Onyń qazasy basqalarǵa eskertý bolady dep senemiz. Adamdar ózderiniń jalǵyz emestigin, únsiz qınalmaýy tıis ekenderin bilýleri kerek», - delingen akter otbasynyń málimdemesinde.

Aıta ketsek, Klaýd HBO tanymal dramasynyń 17 epızodynda Fesko esimdi esirtki saýdagerin somdaǵan.