Aqtaýlyq jas ǵalym leıshmanııaǵa qarsy fıtopreparat oılap tapty

AQTAÝ. QazAqparat – Aqtaýlyq jas ǵalym Mánshúk Ibraeva verbaským ósimdigine zertteý júrgizip, leıshmanııa aýrýyna qarsy fıtopreparat daıyndady. Preparat dertke qarsy kúshti belsendilik kórsetken, dep habarlaıdy QazAqparat tilshisi.

Mánshúk Ibraeva – ál-Farabı atyndaǵy Qazaq ulttyq ýnıversıtetinde bilim alyp, ǵylym jolynda tájirıbesin jetildirgen maman. Onyń ǵylymı baǵyty – tabıǵı qosyndylardyń hımııasy nemese fıtohımııalyq zertteýler.

«Ǵylymı baǵytym boıynsha ósimdikterdiń quramynan dárilik zattardy alamyn. 2015 jyly Qytaıǵa baryp, artemızııa ósimdiginiń quramyn zerttedim. Nátıjesinde, bakterııaǵa qarsy ónim shyqty. Al, 2016 jyly Pákistandaǵy Karachı ýnıversıtetinde verbaským ósimdigine zertteý júrgizdim. Quramynan buryn álemde keltirilmegen jańa eki zat alyndy. Sol zattardan fıtopreparat daıyndadym. Ol leıshmanııa aýrýyna qarsy kúshti belsendilik kórsetti. Nátıjeleriniń barlyǵy patentteldi. Osylaısha, SCOPUS bazasyna materıaldar shyqqan edi. Mundaı nátıjege qoljetkizý úshin tynymsyz eńbek, izdenis, erik-jiger men shydamdylyq qajet. Osy qasıetter árbir ǵalymnan tabylsa, shyǵar shyńymyz bıik bolar edi», - deıdi ol.

Qazirgi tańda Mánshúk Ibraeva Mańǵystaý ósimdikteriniń quramyn zertteý úshin tájirıbelik-botanıkalyq baqpen birlese jumys isteýge nıetti. Ǵalymnyń aıtýynsha, Mańǵystaý – arıdti zona, ósimdikteri aşy, bakterııalardy óltirýge jáne adam aǵzasyna paıdaly. Sondyqtan, aldaǵy jospary boıynsha jergilikti jerde ósetin ósimdikterdiń quramyna zertteý júrgizip, jańa nátıje shyǵarmaq.

Aıta keteıik, jalpy Mańǵystaýda 150-ge jýyq ǵalym bar.