Aqtaýlyq zaǵıp jandar massaj kásibin meńgerip jatyr

AQTAÝ. QazAqparat. Mańǵystaý oblysynyń ortalyǵynda 15 zaǵıp jan bir aılyq massaj kýrsyn oqyp jatyr, dep habarlaıdy QazAqparat tilshisi.

«Kýrs 2021-2025 jyldarǵa arnalǵan bıznesti damytý jónindegi ulttyq joba aıasynda qaralǵan. Barlyǵy 21 jumyssyz turǵyn oqyp júr, onyń 15-i – zaǵıp jan. Oqý barysynda ákimdik tarapynan bul azamattardy ınvataksımen tasymaldaý qarastyrylǵan. Sondaı-aq, shákirtaqy tólenedi, medıtsınalyq tekserýden ótkende qarajaty óteledi», - dedi Aqtaý qalasy ákimdigi halyqty jumyspen qamtý ortalyǵy dırektorynyń orynbasary Nursultan Sherkeshbaev.

Zaǵıp jandarǵa Qytaıdan kelgen qandasymyz massajdyń klassıkalyq túrin úıretip jatyr.

«Zaǵıp jandardyń qoldary sezimtal keledi. Energetıkalyq qýaty joǵary bolady. Osy múmkindikterin tolyǵymen paıdalana otyryp, tabys tapqanyn qaladyq. Olar qoǵamnyń belsendi múshesi bolýǵa quqyly. Sondyqtan, osy massaj kýrsyn oqytýdy qolǵa aldyq», - deıdi kásipker Quralaı Baıǵalıeva.

Qysqa merzimdik kýrsty sátti aıaqtaǵan qatysýshylar 12 aı jumyspen qamtamasyz etiledi. Olardyń qasyna kómekshi beriledi.