Aqtaýlyq taksıst jolaýshylaryna án aıtyp beredi

AQTAÝ. QazAqparat - Aqtaýda taksı júrgizýshisi kóligine mingen jolaýshylarǵa qalanyń kórikti jerleri jaıly aqparat aıtyp, jergilikti aqyndardyń sózine jazylǵan ánderdi aıtyp beredi, dep habarlaıdy QazAqparat tilshisi.

Zeınetker Nurlybaı Batyhov bos ýaqytynda jolaýshylarǵa taksı qyzmetin usynady.

Eń qyzyǵy ol kóligine mingen árbir jolaýshyǵa jaqsy kóńil kúı syılaý úshin án oryndap beredi.

65 jastaǵy Nurlybaı Batyhov úsh qyz, úsh ulynan 10 nemere súıip otyr.

Án aıtýǵa degen qyzyǵýshylyǵy bala kezinen bastalǵan. Túrli qoǵamdyq is-sharalarǵa qatysqan.

Zeınetkerdiń aıtýynsha, jolaýshylar onyń shyrqaǵan ánin qýana tyńdaıdy. Tipti keıbireýleri ándi qosylyp aıtady eken.

«Kóligime ártúrli jolaýshy minedi. Birde bir qyzyq jaǵdaı bolǵan. Anasy men balasy emhanaǵa bara jatyr eken. Men jol boıy bos otyrmaı, qalany tanystyryp, án aıtyp berdim. Bir kezde búldirshin kólikten túspeı, taǵy án aıtýymdy surady. Ne isterimdi bilmeı, kishkentaıǵa nemerelerim bar ekenin, olardyń meni kútip otyrǵanyn aıtýyma týra keldi», - deıdi Nurlybaı Batyhov.