Aqtaýlyq oqýshylar halyqaralyq baıqaýda úzdik atandy

AQTAÝ.QazAqparat - Aqtaýdaǵy Farıza Ońǵarsynova atyndaǵy №29 jalpy bilim beretin mekteptiń oqýshylary Túrkııanyń Ystanbul qalasynda ótken halyqaralyq baıqaýda top jardy, dep habarlaıdy QazAqparat tilshisi.

«Túrik eliniń tórinde ótken halyqaralyq baıqaýǵa álemniń túkpir-túkpirinen 200-ge jýyq ónerpaz qatysqan. Solardyń ishinde estradalyq vokal nomınatsııasy boıynsha «Juldyz» ansambli men jeke oryndaý boıynsha Bekbolat Jumabaı bas júldeni jeńip alǵan. Baıqaýda Araı Tabyldy 1-oryn aldy», - dep málim etti Aqtaý qalalyq bilim bóliminiń baspasóz qyzmetinen.

Oqýshylar respýblıkalyq «Daryndar álemi» baıqaýynda 500 ónerpazdyń arasynan bas júldege ıe bolyp, osy halyqaralyq baıqaýǵa tegin joldama utyp alǵan.

Sonymen qatar bas júlde jeńip alǵan «Juldyz» vokaldyq ansambli de Antalııa qalasynda ótetin «Óner juldyzdary» festıvaline tegin joldama aldy.