Aqtaýlyqtar jylý men sýǵa jarymaı otyr

<p>AQTAÝ. KAZINFORM &ndash; Qalada jylý berý maýsymy 15-qazanda bastaldy. Alaıda kóptegen turǵyn úıge áli kúnge deıin jylý berilmegen.</p>

-Úıimiz salqyn. Pesh qosyp, gaz jaǵyp otyrmyz. Túnde jatqanda qorqamyz. Sý máselesi de sheshilgen joq. Jazdan beri kıim-keshegimizdi árkimniń úıine baryp jýyp, ár jerde jýynyp júrmiz. Іshetin sýdy kósheden avtomattardan tasımyz, - deıdi 32 A shaǵyn aýdan 21-úıdiń turǵyny Janat Baýenova.

Jylýdyń joqtyǵyna odan bólek 8,11,15,18 jáne 19-shaǵyn aýdandardyń turǵyndary da shaǵymdanýda.

Keıbir turǵyndar jylýdyń jáne aýyz sýdyń joqtyǵyn aıtyp, narazylyqtaryn áleýmettik jelide bildirdi. 

Al Aqtaý qalasynyń ákimdigi bolsa, shahardaǵy turǵyn úılerdiń 92 paıyzyna jylý berilgenin jetkizdi.

-23 qazan kúngi málimet boıynsha Aqtaýdaǵy turǵyn úılerdiń 92% jylý berildi. Búgingi kúni magıstraldyq jylý jelilerinde aqaýlar (poryv) joq. Turǵyn úılerdiń mańyndaǵy taratý jelilerinde oryn alǵan 35 aqaý jóndelýde. Oǵan Jańaózen qalasynan arnaıy kelgen 8 brıgada, qala ákimdigi tarapynan 27 adam jáne «Kaspıı jylý, sý arnasy» mekemesinen 11 brıgada jumyldyryldy. Barlyǵy 110 adam men 49 tehnıka jumys jasaýda, - delingen habarlamada.

Ákimdik jylý joq úılerge aqaýlar (poryv) qalpyna keltirilgennen keıin jylý beriletinin jetkizdi. Aıta keteıik, qalada jylý taratý jelileriniń tozýy 79 paıyz.

Buǵan deıin, Aqtaýdaǵy aýyz sý tapshylyǵy týraly jazǵan bolatynbyz.