Aqtaýlyq kásipker afrıkalyq klarıı som balyǵyn ósirip jatyr

<p>AQTAÝ. KAZINFORM &ndash; Aqtaýlyq kásipker Evgenıı Menshenın afrıkalyq klarıı som balyǵyn ósirýmen aınalysady. Ol byltyr 27 tonna balyq ósirdi. Kásibiniń nesibin kórip júrgen qala turǵyny bıyldan bastap balyqtyń basqa túrin ósirýdi josparlap otyr.</p>

34 jastaǵy Evgenıı Menshenın balyq sharýashylyǵymen aınalysyp júrgenine 6 jyl bolǵan. Balyqtarǵa tapsyrys negizinen qaladaǵy sýpermarketterden túsedi eken. Oral, Aqsaı jáne Atyraý qalasynan tapsyrys beretinder de bar. Kásipkerdiń aıtýynsha, balyqty ósirý protsesi jabyq sýmen jabdyqtaý qondyrǵysy arqyly júzege asady.

– Bul kásipti men ákemmen birge bastadym. Alǵashqy eki jyl kásipti tanýmen ótti. Bastapqyda balyqty qalaı ósirý kerek, oǵan qandaı kútim kerek degen suraqtarǵa jaýap izdedik. Kásip óziniń nesibin tek úshinshi jyly bere bastady. Jalpy «Klarıı som» balyǵyn ósirý tıimdi. Sebebi bul balyq sýdy asa talǵamaıdy, ári tez ósedi. Balyqty ósirý protsesi jabyq sýmen jabdyqtaý qondyrǵysy arqyly júzege asady. Balyq 26-30 gradýs aralyǵyndaǵy jyly sýda ósedi. Olar arnaıy Polshadan ákelingen «Aler-Akva» jemimen qorektenedi. Bul jem janýar aqýyzynan turady. Oǵan genetıkalyq túrlendirilgen organızm jáne ósý gormondary qosylmaǵan. Biz jylyna «Klarıı som» balyǵyn 27 tonna shamasynda ósiremiz. Bıyl 65-70 tonna kóleminde ósirýdi josparlap otyrmyz. Sonymen qatar, bıyldan bastap tıpalııa balyǵyn ósirýdi josparlap otyrmyz, - dedi Evgenıı Menshenın.