Aqtaýǵa týrıst tasıtyn charterlik reıs qatynaı bastady

NUR-SULTAN. QazAqparat – Aqtaýǵa týrıst tasıtyn charterlik reıs qatynap, alǵashqy 100 jolaýshyny jetkizgen. Bul týraly ortalyq kommýnıkatsııalar qyzmetinde ótken brıfıngide Mańǵystaý oblysynyń ákimi Nurlan Noǵaev málim etti, dep habarlaıdy QazAqparat tilshisi.

«Aqtaý qalasyndaǵy halyqaralyq áýejaı arqyly aptasyna 27 baǵytta 152 reıs qatynaıdy. Sonyń ishinde 19 baǵytta 62 reıs alys jáne jaqyn shetelge ushady. Sonymen qatar, týrıstik múmkindikti paıdalanyp, jaqyn arada Bashqurtstannan charterlik reıs keldi. Alǵashqy 100 adam qatynady. Buǵan deıin týrıster qalypty reıstermen keletin. Al mynaý arnaıy týrıstik baǵyttaǵy charterlik reıs boldy», - dedi oblys ákimi.

Sondaı-aq, ol Kaspıı teńiziniń áleýetin paıdalaný jónindegi josparlaryn ortaǵa saldy.

«Halyqaralyq deńgeıge shyǵyp, Kaspıı teńizin paıdalaný jónindegi josparlarymyz ázirge ıdeıa retinde ǵana qaralyp jatyr. Qazirgi tańda júzege asyrylyp jatqan joq. Biz Kaspıı teńiziniń jaǵalaýyn paıdalaný jóninde jobalardy oılastyryp jatyrmyz. Kelgen týrısterge, mańǵystaýlyqtarǵa kórshi oblystardan kelgen týrısterge, jalpy qazaqstandyqtarǵa jaǵdaı jasaý boıynsha jumystanyp jatyrmyz.

Aqtaýdyń janynda Jylyjaǵajaı degen ornymyz bar. Sonda qoljetimdi demalys bolatyndaı jaǵdaı uıymdastyryp jatyrmyz. Kaspıı teńizinde balyq sharýashylyǵyn damytýǵa kóńil bólip jatyrmyz. Bıyldan bastap oblys ákimdiginiń janyna 4 jańa basqarma kirdi. Sonyń bireýi – balyq basqarmasy», -dedi Nurlan Noǵaev.

Onyń málimetine sensek, Mańǵystaý oblysynda jyl sońyna deıin 1600-den astam adamdy munaı-gaz salasyna jumysqa alý josparlanǵan.