Aqtaýdyń irgesindegi «Qarakól» kóline qoqıqazdar ushyp keldi

<p>AQTAÝ. KAZINFORM &ndash; Qarakól kóline qonǵan alǵashqy qoqıqazdardy jergilikti turǵyn Azamat Sársenbaev vıdeoǵa túsirgen. Ádette qoqıqazdyń túsi qyzǵylt bolatynyn eskersek, bul joly olardyń qaýyrsyndary erekshe jáne sur tústi.</p>

— Qoqıqazdar nelikten sur degen suraq týyndap jatyr. Bul olardyń týǵan kezdegi tabıǵı túsi. Olardyń tústeri qartaıǵan saıyn qyzǵylt nemese qyzyl bolyp ózgeredi. Oǵan qoqıqazdar jeıtin baldyrlar men shaıandardyń quramyndaǵy pıgmentter áser etedi, - dep jazdy bloger óz jazbasynda.

«Ústirt» memlekettik tabıǵı qoryǵy mamandarynyń aıtýynsha, «Qarakól» kóliniń aýmaǵynda qustardyń 200 den astam túri kezdesedi. Onyń 20 túri qazaqstannyń qyzyl kitabyna engen qustar. Sonyń biri — qoqıqaz. Qoqıqazdar «Qarakól» kólinde tynyǵyp, demalyp, odan ári saparyn ońtústikke qaraı jalǵastyrady. Kúzgi mıgratsııasy qyrkúıekten qazan aıynyń sońyna deıin jalǵasyp, 1 myńnan 5 myńǵa deıin ushyp keledi.

— Qazir «Qarakól» kólinde mıgratsııa endi bastalyp jatyr. Ol qazan aıynyń sońyna deıin bolady. Qys jyly bolsa 10-15 bas qoqıqaz qystap qalady. Sebebi, kóldiń sýy jyly, ári qoregi jetkilikti, - deıdi «Ústirt memlekettik tabıǵı qoryǵy» respýblıkalyq memlekettik mekemesi dırektorynyń mindetin atqarýshy Jasqaırat Nurmuhambetov. 

Buǵan deıin, Mańǵystaýda Qyzyl kitapqa engen jabaıy ań-qustardyń jylyna 15-20% kóbeıip jatqanyn jazǵan edik.