Aqtaýda Kaspıı teńiziniń jaǵalaýynda jylan qaptady

<p>Aqtaý qalasynda Kaspıı teńizindegi sý jylandary jaǵalaýǵa shyǵyp jatyr. Turǵyndar áleýmettik jelide baýyrmen jorǵalaýshylar túsirilgen vıdeolardy jarııalaýda, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform.</a></p>

Al "Ekojer" qaýymdastyǵy Mańǵystaý oblysy boıynsha aımaqtyq ekologııalyq keńesiniń múshesi Ádilbek Qozybaqov sý jylandarynyń adamǵa zııany joǵyn aıtyp otyr.

«Qazir olar qystaýǵa daıyndalyp, toptasyp jatyr. Keıbir toptarda sý jylanynyń sany 200-ge deıin bolýy múmkin. Olar qazan aıynda, keıde kún jyly bolsa qarashada da osylaı boı kórsetýi yqtımal», – dedi ol.

Ekologtyń deregine súıensek, sý jylandary usaq balyqtarmen qorektenedi. Alaıda, yńǵaıy kelse usaq kemirgishterdi aýlaýy múmkin ekenin aıtady.

«Tyshqan sııaqty usaq kemirgishterdi de aýlaıdy. Olar sý tazalyǵynyń ındıkatory sanalady, sebebi las sýda mekendemeıdi. Al Aqtaý qalasynyń teńiz jaǵalaýynda deratızatsııa kezinde ýlanyp ólgen egeýquıryqpen qorektense, olar da ýlanýy yqtımal», – dedi Ádilbek Qozybaqov.

Aıta ketsek, osyǵan deıin Aqtaýda egeýquıryqtardyń kóbeıýine baılanysty olardy joıý jumystary júrgiziletinin jazǵan edik.