Aqtaýdaǵy jańa Oqýshylar saraıynda 5 myń bala qosymsha bilim alady

Mańǵystaý oblysyna jumys saparymen barǵan QR Premer-Mınıstri Álıhan Smaıylov Aqtaý qalasynyń 17-shaǵyn aýdanynda salynǵan jańa Oqýshylar saraıynyń jumysymen tanysty, dep habarlaıdy QazAqparat.

Jańa nysan jaqyn arada óziniń alǵashqy oqýshylaryn qabyldaıdy.

Ol oblys ortalyǵynda, sondaı-aq jaqyn mańdaǵy Munaıly jáne Túpqaraǵan aýdandarynda turatyn 5 000-nan astam balany tegin qosymsha bilimmen qamtýǵa múmkindik beredi.

Munda kórkem, ǵylymı-tehnıkalyq jáne jalpy gýmanıtarlyq baǵyttaǵy úıirmeler, sondaı-aq sport sektsııalary jumys isteıtin bolady.

Oqýshylar saraıynda xop, orkestr jáne mýzykalyq aspaptarda oınaýdy úıretetin jeke sabaqtar qarastyrylǵan, horeografııalyq stýdııa, avıamodeldeý bólmeleri, kompıýterlik synyp, ámbebap sport zaly, sporttyq júzý boıynsha jattyǵý basseınderi, ıoga jáne aerobıka zaldary bar.

Sonymen qatar ǵımaratta dızaın jáne beıneleý óneri stýdııasy, qolóner jáne materıaldardy kórkem óńdeý sheberhanalary, ádebı-drama stýdııasy, kitaphana, kovorkıng-keńistik jáne IT-tehnologııalar zerthanasy bar.

Oqýshylar arasynda shahmatty keńinen nasıahattaý maqsatynda grossmeıster, shahmattan álem jáne Azııa chempıony Bıbisara Asaýbaevanyń shahmat sheberligi mektebi ashylady.

Premer-Mınıstr Memleket basshysy óziniń Saılaýaldy baǵdarlamasynda balalardyń shyǵarmashylyq jáne zııatkerlik áleýetin kóterý úshin keminde 100 iri nysan salýdy tapsyrǵanyn eske saldy. Oqýshylar saraıy – solardyń biri.

«Oqýshylar saraıynyń ashylýy aı saıyn 5 000-nan astam balanyń úıirmeler men sektsııalarǵa tegin barýyna múmkindik beredi. Sonymen qatar 165 maman jumysqa ornalasady», — dedi Álıhan Smaıylov.