Aqtaýdaǵy túrmede aqyly joǵary oqý orny ashyldy

AQTAÝ. QazAqparat – Mańǵystaý oblysyndaǵy túrmede jazasyn ótep jatqandar endi ýnıversıtette oqý múmkindigine ıe boldy, dep habarlaıdy QazAqparat.

Mańǵystaý oblysy boıynsha QAJD GM-172/6 qaýipsizdigi barynsha joǵary mekemesiniń sottalǵandaryna arnaýly orta ǵana emes, joǵary bilim alýǵa da múmkindik berildi. Sottalǵandar Qazaqstannyń logıstıka jáne kólik akademııasynda qashyqtan oqıtyn bolady.

Joǵary oqý ornyna túsý úshin sottalǵandar qarapaıym abıtýrıentpen birdeı barlyq protsedýradan ótýi kerek. Oqý aqyly, jylyna – 400 myń teńge.

«Qazirgi ýaqytta 12 sottalǵan talapker JOO-ǵa túsý emtıhandaryna daıyndalýda, qabyldaý komıssııasy jazdyń sońynda olardy qaraýǵa kirisedi. Oqytý negizinen kóliktik tehnıka mamandyqtar boıynsha júrgiziledi. Ákimshilik óz kezeginde bizdiń stýdentterdi tabysty oqytý úshin tehnıkalyq qamtamasyz etýdi daıyndaıdy», – dedi Mańǵystaý oblysy boıynsha QAJD baspasóz qyzmetinen.