Aqtaýdaǵy polıtsıeı ólimi: kúdikti eki aıǵa qamaýǵa alyndy

AQTAÝ. QazAqparat – Aqtaýda polıtseıdi pyshaqtap óltirdi degen aıyppen ustalǵan kúdikti eki aıǵa qamaýǵa alyndy. Muny QazAqparat tilshisiniń saýalyna jaýap bergen Aqtaý qalalyq mamandandyrylǵan sotynyń baspasóz qyzmeti rastady.

Aıta ketsek, bul oqıǵa 2 tamyz kúni bolǵan. Aqtaý qalasy ıývenaldy polıtsııasynyń kámeletke tolmaǵandar isi jónindegi ýchaskelik ınspektoryn 27 jastaǵy kúdikti pyshaqtap tastaǵan. Polıtsııa dereginshe, aýyr jaraqat alǵan 26 jastaǵy tártip saqshysy jansaqtaý bóliminde esin jımastan kóz jumdy. Keshe bul iske qatysy bar delingen kúdiktiniń ustalǵanyn habarlaǵan bolatynbyz. Al, búgin Aqtaý qalasynyń mamandandyrylǵan soty kúdiktini eki aıǵa qamaýǵa alý týraly tergeýshi ótinishin qarady.

«Aqtaý qalasynyń mamandandyrylǵan soty 5 tamyzda Qylmystyq kodekstiń 99-baby 1-tarmaǵyna («Adam óltirý») sáıkes tergelip jatqan kúdikti J.-ni eki aı merzimge «kúzetpen ustaý» túrindegi bultartpaý sharasyn qabyldady», - dep málim etti Aqtaý qalasynyń mamandandyrylǵan sotynyń baspasóz qyzmetinen.

Eske sala keteıik, qaza tapqan polıtsııa qyzmetkeri – Mańǵystaý oblysynyń týmasy. Úılengen, 3 balasy bar. Qaıǵyly oqıǵa kezinde ol eńbek demalysynda bolǵan.

Foto: www.lada.kz